پرەزيدەنت جاستاردى بەلسەندى تۇردە مەملەكەتتىك قىزمەتكە تارتىپ جاتىر - ەرلان قارين

نۇر-سۇلتان. قازاقپارات - ق ر پرەزيدەنتىنىڭ كەڭەسشىسى ەرلان قارين ەلدەگى سوڭعى كادرلىق اۋىس-تۇيىسكە قاتىستى پىكىر ءبىلدىردى، دەپ حابارلايدى قازاقپارات.

«پرەزيدەنت قاسىم-جومارت توقايەۆ كادرلاردى ارالاستىرىپ، تىڭ امالداردى پايدالانۋ جولىمەن مەملەكەتتىك قىزمەت جۇيەسىنە جاڭا باسقارۋشىلاردى تارتۋ ءىسىن بەلسەندى تۇردە قولداپ كەلەدى. اتاپ ايتقاندا مەملەكەت باسشىسى پرەزيدەنتتىك كادرلىق رەزەرۆىن قۇرىپ، ونىڭ اياسىندا 300 رەزەرۆشى ىرىكتەلدى. ولاردىڭ 150 ءى مەملەكەتتىك جانە كۆازيمەملەكەتتىك سەكتوردا جۇمىسقا ورنالاستى. بۇگىن عانا پرەزيدەنتتىڭ كادرلىق رەزەرۆىنىڭ وكىلى ايبەك ساتتىبايەۆ شىمكەنت قالاسى اكىمىنىڭ ورىنباسارى بولىپ تاعايىندالدى. سونىمەن قاتار، كەشە ۇلتتىق سەنىم قوعامدىق كەڭەسىنىڭ مۇشەسى شىڭعىس مۇقان شىمكەنت قالاسى اكىمىنىڭ ءبىرىنشى ورىنباسارى بولدى»، - دەپ جازدى ەرلان قارين تەلەگرام كانالىندا.

پرەزيدەنتتىڭ كەڭەسشىسى شىڭعىس مۇقان ۇلتتىق كەڭەستىڭ مەملەكەتتىك قىزمەتكە قابىلدانعان العاشقى مۇشەسى ەمەس ەكەنىن دە ەسكە سالدى. بۇعان دەيىن ۇلتتىق كەڭەس قاتارىنان «جۇمىلدىرىلعان» باعدات مۋسين الدىمەن پرەزيدەنتتىڭ كەڭەسشىسى بولسا، قازىرگى ۋاقىتتا سيفرلىق دامۋ، يننوۆاتسيا جانە اەروعارىش ونەركاسىبى مينيسترلىگىنىڭ ۋاقىتشا ءمينيسترى بولعان.

ال بەرىك ءابدىعالي ۇلى 2019-جىلدىڭ قازان ايىندا قاراعاندى وبلىسى ۇلىتاۋ اۋدانىنىڭ اكىمى بولىپ تاعايىندالسا، ماكسيم سپوتكاي جاقىندا پارلامەنت سەناتى اپپاراتى باسشىسىنىڭ ورىنباسارى بولىپ بارعان.

«وسىلايشا كەيىنگى ۋاقىتتا جاستار مەن قوعام وكىلدەرى اراسىنان پرەزيدەنت جاڭا كادرلاردى بەلسەندى تۇردە تارتىپ جاتىر. وسىنىڭ ارقاسىندا باسقارۋشى بۋىن جوسپارلى تۇردە جاڭارتىلۋدا»، - دەدى ول.