كارانتين رەجيمىنىڭ ۇزارتىلۋى: ءوڭىر اكىمدەرىنە تاپسىرما بەرىلدى
بۇل تۋرالى كەشە وتكەن كوروناۆيرۋستىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ وتىرىسىندا ايتىلعان، دەپ حابارلايدى قازاقپارات.
كارانتين رەجيمىنىڭ ۇزارتىلۋىنا بايلانىستى وڭىرلەر اكىمدىكتەرىنە بيزنەس سۋبەكتىلەرىمەن كارانتين شارالارى اياقتالعاننان كەيىن ولاردىڭ قىزمەتىن قالپىنا كەلتىرۋ بويىنشا الدىن الا جۇمىس جۇرگىزۋ تاپسىرىلدى.
سونداي-اق، جيىندا دەنساۋلىق ساقتاۋ مينيسترلىگىنە اعىمداعى جىلدىڭ 5- تامىزىنا دەيىن ەنگىزىلەتىن نىساندار بويىنشا سانيتارلىق تالاپتاردى بەكىتۋ جانە جاريالاۋ تاپسىرىلدى.
ەسكە سالساق، ق ر پرەمەر-ءمينيسترىنىڭ ورىنباسارى ەرالى توعجانوۆتىڭ توراعالىعىمەن وتكەن ۆەدومستۆوارالىق كوميسسيا پرەزيدەنت تاپسىرمالارىن ەرەكشە باقىلاۋعا الدى.
ايتا كەتسەك، قازاقستاندا شىلدە ايىنىڭ ورتاسىندا ەكى اپتاعا سوزىلاتىن كارانتين ەنگىزىلگەن بولاتىن. كەشە مەملەكەت باسشىسى قاسىم-جومارت توقايەۆ ەپيدەميولوگيالىق احۋالدى تۇراقتاندىرۋ جونىندە كەڭەس وتكىزىپ، كارانتين شارالارىن تاعى ەكى اپتاعا ۇزارتۋدى تاپسىرعان ەدى.