قۇر سۋمەن دەزينفەكتسيا جاساپ ءجۇر: شىمكەنت اكىمدىگى جەلىدە تاراعان ۆيدەوعا جاۋاپ بەردى

شىمكەنت. قازاقپارات - كەشە الەۋمەتتىك جەلىلەردە شىمكەنت كوشەلەرىندە مامانداردىڭ دەزينفەكتسيالىق قۇرالدىڭ ورنىنا جاي سۋ شاشىپ جۇرگەنى تۋرالى ۆيدەو تاراعان ەدى.

وسىعان بايلانىستى بۇگىن شىمكەنت قالاسى اقپارات-كوممۋنيكاتسيا ورتالىعىندا وتكەن بريفينگتە اتالمىش بەينەجازباعا قاتىستى ساۋالدارعا شىمكەنت قالاسى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى عالىمجان ابىشيەۆ پەن شىمكەنت قالالىق ەنەرگەتيكا جانە كوممۋنالدىق شارۋاشىلىق باسقارماسى باسشىسىنىڭ ورىنباسارى بولات ماليموۆ جاۋاپ بەردى.

«سىركە قىشقىلى قوسپاسى كوپقاباتتى تۇرعىن ءۇي اۋلاسىنا (1156 اۋلا) جانە حالىق كوپ شوعىرلاناتىن قوعامدىق ورىندارعا ارنايى سۋ شاشاتىن قۇرىلعىمەن سەبىلەدى. جۇمىس كونتسەنتراتسياسىندا قولدانىلاتىن (0,001- 0,03 پايىز) نۋك ەرىتىندىلەرىنىڭ وتكىر ءيىسى جوق، جەرگىلىكتى تىتىركەندىرگىش، سەنسيبيليزاتسيالايتىن جانە كۋمۋلياتيۆتى اسەرى جوق جانە تىنىس الۋ ورگاندارىنا تراۆماتيكالىق اسەر ەتپەيدى.

ياعني، سۇيىلتىلعان، ۋىتى از زات. قازىرگى تاڭدا قالانى زالالسىزداندىرۋ جۇمىسىنا ەكى ءتۇرلى قوسپا قولدانىلىپ ءجۇر. اتاپ ايتقاندا، گيپوحلوريد كالتسي 35 پايىز (حلور) جانە سىركە قىشقىلى. جوعارىدا اتالعان ەكى قوسپانىڭ دا ءتيىستى ساراپتامالىق قورىتىندىسى بار»، - دەدى ب. ماليموۆ.

ياعني، بەينەجازبادا كورسەتىلگەن ەڭبەكشى اۋدانىندا اسكەريلەر جاساعان دەزينفەكتسيا جۇمىسىنا سىركە قىشقىلى قولدانىلعان. مامانداردىڭ ايتۋىنشا، مۇنىڭ سۋمەن ارالاسقاننان كەيىن ءيىسى بولمايدى، ءتۇسى دە وزگەرمەيدى. ادام اعزاسىنا كەرى اسەرى جوق، قورشاعان ورتاعا قاۋىپتى ەمەس.

ءبىر تيىمدىلىگى - باكتەريالاردى تەز ارادا ولتىرەدى.

ايتا كەتەيىك، اتالعان سۇيىقتىق دۇنيەجۇزىلىك دەنساۋلىق ساقتاۋ ۇيىمىمەن بەكىتىلگەن، ارنايى سەرتيفيكاتى بار. ءبىراق بەينەجازبا بارىسىندا بۇل جونىندە اسكەريلەر دەر كەزىندە جاۋاپ بەرە الماعان. اسكەريلەردىڭ بەينەجازبا اۆتورىنىڭ ساۋالدارىنا جاۋاپ بەرە الماۋىنىڭ سەبەبى - ولاردىڭ قۇرىلعىسىنا سىركە قىشقىلى ارالاسقان ارنايى سۋدى اكەپ بەرەدى ەكەن. جاۋاپتىلاردىڭ سوزىنە سەنسەك، سىركە قىشقىلىن ەلىمىزدىڭ وزگە دە وڭىرلەرىندە كوروناۆيرۋسقا قارسى كەڭىنەن قولدانىپ جاتىر.

بۇگىندە ناتيجەسى دە جامان ەمەس. - قازىرگى تاڭدا شىمكەنت قالاسىندا ىندەتتىڭ ءوسۋ ديناميكاسى تومەندەۋدە. بۇل - اتقارىلىپ جاتقان سانيتارلىق جۇمىستاردىڭ ناتيجەسى. ال الەۋمەتتىك جەلىدە تارالعان بەينەجازبا جايىندا ايتسام، زالالسىزداندىرۋ زاتتارىن قاراپايىم حالىق پايدالانۋعا بولمايدى. دەزينفەكتسيالىق زاتتاردىڭ ءۇش ءتۇرى بولادى. دەزينفەكتسيا ميكروورگانيزىمدەرگە، دەزينتسەكتسيا جاندىكتەرگە جانە ءۇشىنشى ءتۇرى - دەراتيزاتسيا، - دەدى ع. موتاي ۇلى.

سونداي-اق، بريفينگتە الەۋمەتتىك جەلىدە بەينەجازبا اۆتورىنا ارنايى تۇسىندىرمە جۇمىسى جۇرگىزىلگەنى جانە دەزينفەكتسيالىق زاتتاردىڭ ساراپتامالىق قورىتىندىسى بار ەكەنى ايتىلدى. سونىمەن قاتار ب ا ق وكىلدەرى تاراپىنان قوسىمشا قويىلعان سۇراقتارعا جان-جاقتى جاۋاپ بەرىلدى.