اتىراۋ وبلىسىنىڭ اكىمى رەسەيلىك دارىگەرلەرگە العىس ايتتى
وبلىس اكىمى ماحامبەت دوسمۇحامبەتوۆتىڭ مالىمەتىنشە، رەسەيلىك دارىگەرلەردىڭ اتىراۋعا كەلۋى دەر كەزىندەگى كومەك بولدى. قازىر ناۋقاستار سانى ازايعان. اتىراۋلىقتاردىڭ كوروناۆيرۋس ينفەكتسياسىنان ساۋىعۋ ديناميكاسى جوعارىلاعان. باستاپقىدا دارىگەر تاپشىلىعى بايقالعانمەن، مەديتسينا سالاسى جاس كادرلارمەن تولىعىپ جاتىر. وبلىستىق كارديولوگيالىق ورتالىقتىڭ قاۋىپتى ايماعىندا ەكى اپتا ەڭبەك ەتكەن استراحاندىق دارىگەرى اننا چەپەل اتىراۋلىق ارىپتەستەرىن ءوز ءىسىنىڭ شەبەرى دەپ ەسەپتەيدى.
«اتىراۋلىق ارىپتەستەرىمىز شىن مانىندە بار ءومىرىن جۇمىستا وتكىزىپ جاتىر. بۇل - ۇلكەن ەڭبەك. بۇعان ءبىز ناۋقاستاردى ەمدەۋ شارالارىنا تىكەلەي اتسالىسۋ كەزىندە كۋا بولدىق. قازاقستاندىق تاراپ قولدانىپ وتىرعان پرەپاراتتار ءبىزدىڭ ەمدەۋ حاتتامامىزعا تولىق سايكەس كەلەدى»، - دەدى ول.
ماسكەۋلىك دارىگەرلەردى باستاپ كەلگەن ۆلاديمير ۆلاسوۆ 2№ وبلىستىق اۋرۋحانادا جۇمىس ىستەگەن. ونىڭ ايتۋىنشا، رەسەيلىكتەر اتىراۋداعىداي احۋالدى ناۋرىز، ءساۋىر ايلارىندا باستان وتكەرگەن.
«باستىسى - ستاتسيونارلاردا ۇيىمداستىرۋ جۇمىسى جوعارى دەڭگەيدە. كادر ماسەلەسى دە قازىر شەشىلىپ كەلەدى. سىرقاتتانىپ قالعان دارىگەرلەر دە قاتارعا قوسىلۋدا. ءبىز دە ارىپتەستەرىمىزدەن ءبىراز نارسەنى ۇيرەندىك. بۇل جەردە اتىراۋلىق دارىگەرلەردىڭ كاسىبي شەبەرلىگىن، ءوز ءومىرىن، وتباسىن قاۋىپكە تىگىپ، ادام ءومىرىن جانقيارلىقپەن قۇتقارۋ جولىندا ەڭبەك ەتىپ جۇرگەنىن اتاپ وتكەنىمىز ءجون»- دەيدى ول.
رەسەيلىك دارىگەرلەر اتىراۋداعى ينفەكتسيالىق جانە پروۆيزورلىق ستاتسيونارلاردا ناۋقاستاردى ەمدەۋگە قاتىستى. ولاردىڭ اراسىندا انەستەزيولوگ- رەانيماتولوگ، پۋلمانولوگ، ينفەكتسيونيست، جالپى تاجىريبەلىك دارىگەر، پەدياترلار بار. بۇگىنگى كۇنى اتىراۋ وبلىسىندا ەپيدەميولوگيالىق احۋالدىڭ تۇراقتاندى.
وسىعان بايلانىستى اتىراۋدا كارانتيندىك ورىندار سانى 90 پايىزعا دەيىن قىسقارتىلىپ، پروۆيزورلىق ستاتسيونارلارداعى كەرۋەتتەر ازايتىلىپ جاتىر. ال تامىزدا اۋرۋحانالار جوسپارلى ەمدەۋ شارالارىنا كوشەدى.
ەسكە سالا كەتەلىك، بۇدان بۇرىن اتىراۋدا كوروناۆيرۋس جۇقتىرعانداردىڭ 60 پايىزى ىندەتتەن جازىلىپ كەتكەن ەدى.