ەلوردادا كوتەرمە-تاراتۋ لوگيستيكا ورتالىعى سالىنادى
قالالىق ينۆەستيتسيالار جانە كاسىپكەرلىكتى دامىتۋ باسقارماسىنىڭ باسشىسى ەرلان بەكمۇرزايەۆ وسىلاي ءمالىم ەتتى، دەپ حابارلايدى قازاقپارات ەلوردا ينفوعا سىلتەمە جاساپ.
«كوتەرمە-تاراتۋ ورتالىقتارىندا كوكونىس ساقتاۋ جەلىسىن دامىتۋ بويىنشا ناقتى ينۆەستورلارمەن جۇمىس ىستەۋدى باستادىق. قازىرگى ۋاقىتتا كوتەرمە-تاراتۋ ورتالىقتارىنىڭ قۇرىلىسى بويىنشا 3 ينۆەستور بار. سونىمەن قاتار، مينيسترلىكپەن بىرلەسىپ مەملەكەتتىك-جەكەشەلىك سەرىكتەستىك ارقىلى قوسىمشا كوتەرمە-تاراتۋ ورتالىقتارىن سالۋ جونىندەگى جۇمىس جۇرگىزىلىپ جاتىر. بۇل ينفراقۇرىلىمنىڭ ءبارى بولاشاقتا ەلوردانىڭ الەۋمەتتىك ازىق-تۇلىك قاۋىپسىزدىگىن قامتاماسىز ەتەدى»، - دەيدى باسقارما باسشىسى.
ەسكە سالا كەتسەك، ق ر ساۋدا جانە ينتەگراتسيا مينيسترلىگى «ۇلتتىق تاۋار وتكىزۋ جۇيەسىن قۇرۋ» جوباسىن مەملەكەتتىك-جەكەشەلىك سەرىكتەستىك كومەگىمەن ازىرلەۋدى قولعا الدى.
ال، ءساۋىر ايىنىڭ سوڭىندا ۇكىمەت باسشىسى اسقار مامين اكىمدىكتەردىڭ بارىنە كوتەرمە-تاراتۋ ورتالىعىن سالۋ ءۇشىن ارنايى جەر ۋچاسكەسىن ءبولۋدى مىندەتتەگەن بولاتىن.