قوستانايدىڭ «توبىلى» شەتەلدىك ەكى فۋتبولشىمەن ەڭبەك شارتىن ءۇزدى

قوستاناي. قازاقپارات - «توبىل» فۋتبول كلۋبى شەتەلدىك ەكى لەگيونەرمەن كەلىسىمشارتتى توقتاتتى، دەپ حابارلايدى قازاقپارات كلۋبتىڭ رەسمي سايتىنا سىلتەمە جاساپ.

ەۋروپاداعى دارىندى جاس فۋتبولشىلاردىڭ ءبىرى سانالاتىن لۋكا زارانديا قوستانايعا جاڭا ماۋسىمنىڭ باسىندا كەلگەن بولاتىن. ەندى گرۋزيالىق جارتىلاي قورعاۋشىنى جالعا الۋ كەلىسىمىنىڭ مەرزىمى اياقتالدى. قوستاناي كلۋبىنىڭ قۇرامىندا لۋكا زارانديا ەكى ماتچ وتكىزىپ، ءبىر گولدىڭ اۆتورى اتاندى.

«توبىل» فۋتبول كلۋبىنىڭ باسشىلىعى مەن قورعاۋشى ستيۆەن ەزە ءوزارا كەلىسىم بويىنشا ەڭبەك شارتىن بۇزدى. نيگەريا ويىنشىسى قوستانايلىقتارعا ماۋسىم الدىنداعى جيىنداردا قوسىلدى. باقىلاۋ كەزدەسۋلەرىنىڭ بىرىندە العان جاراقاتىنا بايلانىستى ستيۆەن «توبىل» جەيدەسىندە رەسمي ماتچ وتكىزبەدى. ماۋسىم ايىنىڭ سوڭىندا ەزە تۇركيادا وتا جاساتتى، قازىرگى ۋاقىتتا قالپىنا كەلتىرۋ جۇمىستارى جالعاسۋدا»، - دەلىنگەن «توبىلدىڭ» رەسمي سايتىنداعى اقپاراتتا.