كوبەيتۇز كولىندەگى موبيلدى بەكەتتەر قالاي جۇمىس ىستەيدى؟

None
None
نۇر-سۇلتان. قازاقپارات - ەلوردا ماڭىنداعى كولدەر كارانتين اياقتالعانشا كۇزەتىلەدى، دەپ حابارلايدى قازاقپارات Polisia.kz-كە سىلتەمە جاساپ.

سانيتارلىق نورمانىڭ ساقتالۋى ءۇشىن اقمولا وبلىستىق پوليتسيا دەپارتامەنتى باستىعىنىڭ تاپسىرماسى بويىنشا كوبەيتۇز كولىنە باراتىن ەكى كولىك جولىندا ءۇش موبيلدى بەكەت قويىلعان.

ولار تىيىم سالىنعان كول اۋماعىنا كىرۋ جانە شىعاتىن تۇستى باقىلايدى. كول جاعالاۋى ماڭىن قوسىمشا پوليتسيا ەكيپاجدارى شولىپ جۇرەدى. كارانتين شەكتەۋلەرىنىڭ ساقتالۋىنا 15 پوليتسيا قىزمەتكەرى، سونىمەن قاتار اۋدان اكىمدىگى مەن سانيتاريا سالاسىنىڭ قىزمەتكەرلەرى جۇمىلدىرىلعان.

سونداي-اق اۋداننىڭ جەرگىلىكتى اتقارۋشى ورگاندارى كول جاعاسىنا كولىك وتە جاقىن كەلمەۋى ءۇشىن جاساندى كەدەرگى ورناتۋدى قولعا الدى. العاشقى دەمالىس كۇندەرى عانا وسى ماڭدا پوليتسيا 34 اكىمشىلىك قۇقىقبۇزۋشىلىقتى انىقتادى.

ادامدار 18 رەت قوعامدىق ءتارتىپتى بۇزىپ، 16 جاعدايدا جول قاۋىپسىزدىگىنە قاتەر توندىرگەن.

ەسكە سالا كەتسەك، ەكولوگيا، گەولوگيا جانە تابيعي رەسۋرستار مينيسترلىگى كوبەيتۇزدىڭ لاستانىپ، ول جاقتان تۇزدىڭ تيەلىپ اكەتىلۋىنە بايلانىستى الاڭداۋشىلىق ءبىلدىردى. كەيىن كوبەيتۇز جانە سول ماڭداعى تاعى ءۇش كول كارانتينگە جابىلىپ، وندا بارۋعا تىيىم سالىندى.

سونىمەن قاتار، كولدىڭ تۇزىن ساتقاندار انىقتالدى. اقمولا وبلىسىنىڭ پوليتسەيلەرى كولىگىمەن كولگە كىرىپ كەتكەن ادامنىڭ تابىلىپ، جازالانعانىن حابارلادى. اقمولا وبلىسىنىڭ تابيعي رەسۋرستار جانە تابيعاتتى پايدالانۋدى رەتتەۋ باسقارماسى كوبەيتۇز بەن قورجىنكول كولدەرىن 49 جىلعا جالعا بەرۋگە بايقاۋ جاريالاعان ەدى. كەيىننەن كوبەيتۇز جالعا بەرىلمەيتىن بولدى.

سوڭعى جاڭالىقتار