كوزىمنىڭ قاراسى: ابايدىڭ ءانى العاش رەت جاپون تىلىندە شىرقالدى

None
None
نۇر- سۇلتان. قازاقپارات - ابايدىڭ ءانى العاش رەت جاپون تىلىندە شىرقالدى، دەپ حابارلايدى قازاقپارات قازاقستاننىڭ سىرتقى ىستەر مينيسترلىگىنە سىلتەمە جاساپ.

جاپون ءانشىسى رانكا «كوزىمنىڭ قاراسى» ءانىن جاپون تىلىندە ورىنداپ، سول ارقىلى قازاقستاندىقتاردى قازاق اقىنى ابايدىڭ 175 جىلدىعىمەن قۇتتىقتادى. ول سونداي- اق كوروناۆيرۋس پاندەمياسى كەزىندە قازاقستان حالقىنا وسى سىناقتان سۇرىنبەي ءوتىپ، قالىپتى ومىرگە تەز ورالۋىن تىلەدى.

مۋزىكالىق كومپوزيتسيانىڭ ءداستۇرلى جاپون ارانجيروۆكاسى «كوتو» ۇلتتىق شەرتپەلى اسپابىنىڭ دىبىستالۋىمەن «Zerosta» پروديۋسەرلىك كومپانياسىمەن جاسالدى. ءاننىڭ ءسوزىن جاپون تىلىنە «Wako» ۋنيۆەرسيتەتىنىڭ پروفەسسورى حيروكي ساكاي اۋداردى. جالپى ول - قازاق حالقىنىڭ فولكلورلىق- ميفولوگيالىق مۇراسى تۋرالى بىرنەشە كىتاپتىڭ اۆتورى، ونىڭ ىشىندە ابايدىڭ «قارا سوزدەرىن» جاپون تىلىنە اۋدارعان.

«قازاقستاننىڭ جاپونياداعى ەلشىلىگىنىڭ دوستار توبى ىزگى نيەت جوباسىنىڭ ماقساتى - اباي شىعارماشىلىعىنىڭ كوركەمدىك جانە ەستەتيكالىق مازمۇنىن جاپون تىلىندە جەتكىزۋ ارقىلى قازاق مادەنيەتىن دارىپتەۋ» دەپ ءمالىم ەتتى ۆەدومستۆودان.

ايتا كەتەيىك، رانكا - كومپوزيتور، جاپوندىق حالىق جانە زاماناۋي مۋزىكانىڭ ورىنداۋشىسى، سونداي- اق «Japan Record Awards» مۋزىكالىق سىيلىعىنىڭ گران- پري يەگەرى.



سوڭعى جاڭالىقتار