18:15, 24 - شىلدە 2020 | GMT +6
سەناتور نۇرتورە ءجۇسىپ اتۋ جازاسى تۋرالى ۇسىنىس جاسادى
نۇر-سۇلتان. قازاقپارات - سەنات دەپۋتاتى نۇرتورە ءجۇسىپ ساتبايەۆتاعى وقيعادان كەيىن پەدوفيلداردى اتۋ كەرەك دەپ وتىر.
بۇل تۋرالى سەناتور facebook-تەگى پاراقشاسىندا جازدى.
ايۋاندى اتۋعا بولادى! ازعىندىق جولعا ءتۇسىپ، ادامدىق قاسيەتىنەن ايرىلعان ادامدى ءبىزدىڭ قازاق «ايۋان» دەيتىن… جالعىز ساتبايەۆ قالاسىندا عانا ەمەس، رەسپۋبليكا كولەمىندە پەدوفيل كوبەيدى. بۇل - ايۋاندار كوبەيگەنىن اڭعارتادى. قۇتىرعان ءيتتىڭ ءوزىن اتىپ تاستايمىز! ادامنان ايۋانعا اينالعانداردى نەگە اتۋعا بولمايدى؟! ايۋانعا ادام قۇقىعى دەگەن مۇسىركەۋمەن قاراۋعا بولمايدى، - دەپ جازدى نۇرتورە ءجۇسىپ.
ايتا كەتەيىك، 23-شىلدە كۇنى كەشكى ساعات 9 دا قاراعاندى وبلىسىنا قاراستى ساتبايەۆ قالاسىنىڭ ىشكى ىستەر باسقارماسىنا 5 جاسار قىزدىڭ جوعالعانى تۋرالى ارىز تۇسكەن. دەرەۋ ىزدەستىرۋ ناتيجەسىندە ءبۇلدىرشىن قالاداعى ءبىر ۇيدەن تابىلعان. جاس قىزدى زورلادى دەگەن كۇدىكپەن ءبىر ازامات قاماۋعا الىندى.
BAQ. KZ