ش ق و- دا الاكولدىڭ نەلىكتەن كارانتينگە جابىلعانى ءتۇسىندىرىلدى

وسكەمەن. قازاقپارات - شىعىس قازاقستان تۇرعىندارى مەن وبلىس قوناقتارىنان الاكول كولىنە بارماۋدى سۇرايدى، دەپ حابارلايدى قازاقپارات ءتىلشىسى ش ق و تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنە سىلتەمە جاساپ.

مەكەمەدەگىلەردىڭ ايتۋىنشا، وبلىس پەن ءۇرجار اۋدانىندا كوروناۆيرۋس جۇقتىرعاندار سانىنىڭ ارتۋىنا بايلانىستى اۋداننىڭ مەملەكەتتىك باس سانيتاريا دارىگەرى كارانتين ءتارتىبىن كۇشەيتىپ، الاكول جاعاسىنا شەكتەۋ شارالارىن جاريالاۋعا ءماجبۇر بولعان. قازىرگى ۋاقىتتا شىعىس قازاقستان وبلىسى مەن ءۇرجار اۋدانىنداعى COVID-19 كوروناۆيرۋس ينفەكتسياسى جاعدايى كۇردەلى، اۋرۋدىڭ ەڭ جوعارى كورسەتكىشى ءالى تىركەلگەن جوق. «وسىعان بايلانىستى، تۇرعىندار، دەمالۋشىلار مەن قىزمەتشىلەردىڭ جاپپاي كوروناۆيرۋسقا شالدىعۋىنىڭ الدىن الۋ ءۇشىن ءۇرجار اۋدانىنىڭ مەملەكەتتىك باس سانيتاريا دارىگەرى 2020 -جىلدىڭ 22 - شىلدەسىندە «ءۇرجار اۋدانىنىڭ تۇرعىندارى اراسىندا كوروناۆيرۋس ينفەكتسياسىنىڭ الدىن الۋ شارالارى تۋرالى» 7№قاۋلىنى قابىلدادى»،- دەپ ءتۇسىندىردى باسپا ءسوز قىزمەتىندەگىلەر. ەسكە سالا كەتسەك، 2020 -جىلدىڭ 23 -شىلدەسىنەن ءۇرجار اۋدانىنداعى الاكول كولىنىڭ تۋريستىك ايماعىندا تۇرۋعا جانە دەمالۋعا تىيىم سالىندى. جول جابىلىپ، الاكولگە اپاراتىن تاسجولداردا ءموبيلدى پوست قويىلدى. ول جەردى پوليتسيا قىزمەتكەرلەرى كۇن سايىن باقىلاۋعا العان.

اۆتورى ورال ەرلان ۇلى