وزبەكستاندا «ابايدىڭ دانا ءسوزى» اتتى كىتاپ جارىققا شىقتى
تانىمال ويشىل جانە ۇلى اقىن اباي مۇراسىنىڭ ماڭىزىنىڭ سىرى نەدە؟ مۇمكىن، ونىڭ ماڭگۇرتتىكتىڭ حالىققا قانشالىقتى ۇلكەن زيان كەلتىرەتىنىن، ۇلتتىق بىرەگەيلىكتەن باس تارتۋ ادامزاتتى تىعىرىققا اكەلىپ تىرەيتىنىن كورە جانە تۇسىنە الۋ قابىلەتىندە شىعار.
وزبەكستان جازۋشىلار وداعى الەم حالىقتارىنىڭ ادەبيەتىن زەرتتەۋ جانە ناسيحاتتاۋ، وسى باعىتتاعى ىنتىماقتاستىقتى كەڭەيتۋ بويىنشا اۋقىمدى جۇمىستار جۇرگىزۋدە. باۋىرلاس حالىقتاردىڭ ادەبيەتىن ناسيحاتتاۋ ماقساتىندا «ادەبيەت دوستىعى - ماڭگىلىك دوستىق» ايدارىمەن شىققان جاڭا كىتاپ بارشاعا وي سالادى.
بيىل ابايدىڭ تۋعانىنا 175 جىل تولادى. اقىن شىعارماسى تەك قازاقتىڭ عانا ەمەس، بۇكىل ورتا ازيا حالىقتارىنىڭ اعارتۋشىلىق ومىرىندە ەرەكشە ورىن الادى.
اباي شىعارماشىلىعى تۋرالى جاڭا كىتاپ ادەبيەتشىلەر اراسىندا ۇلكەن قىزىعۋشىلىق تۋدىرادى. كىتاپ اۆتورى قوديرجون نوسيروۆ بۇعان دەيىن دە ماقالالار جازىپ، ابايدىڭ ءومىرى مەن قىزمەتى تۋرالى وقۋ-ادىستەمەلىك قۇرالدار جاسادى.
ادەبيەتشىلەردىڭ پىكىرىنشە، جاڭا تۋىندىدا اۆتور دەرەكتەر نەگىزىندە قازاق ادەبيەتى مەن مادەنيەتى تاريحىنداعى ابايدىڭ ءرولىن كورسەتۋگە، سونداي-اق ۇلى ويشىل مۇراسىنىڭ يدەيالىق-ەستەتيكالىق قۇندىلىعى ماسەلەلەرىنە وزىندىك كوزقاراسىن بىلدىرۋگە تىرىسادى.
كىتاپتا ابايدىڭ ءسوز ونەرىندەگى جاڭاشىلدىعى، قوعام قايراتكەرى رەتىندە جان-جاقتى جەتىلگەن، تولىق ادام تۋرالى ارمان-تىلەكتەرى كورسەتىلگەن.