قوستاناي تۇرمەلەرىندە ماسكا تىگۋ ءوندىرىسى ىسكە قوسىلدى

قوستاناي. قازاقپارات - قوستاناي وبلىسىنىڭ تۇرمەلەرىندە مەديتسينالىق ماسكا تىگۋ ءوندىرىسى قارقىن الدى، دەپ حابارلايدى قازاقپارات.

قوستاناي وبلىسى بويىنشا قىلمىستىق-اتقارۋ جۇيەسى دەپارتامەنتى رەسپۋبليكالىق «ءبىز بىرگەمىز» اكتسياسىنا ۇلەسىن قوسۋدا.

اتاپ ايتقاندا، «ۋك 161-2» تۇزەۋ مەكەمەسىندە جازاسىن وتەۋشىلەر ەكى ايدىڭ ىشىندە 80 مىڭنان استام ماسكا جانە 400 گە جۋىق قورعانىش كوستيۋمىن تىككەن.

«سەحتا تاۋلىگىنە 1000 نان استام ماسكا تىگىلەدى. ءونىم سەرتيفيكاتتاۋدان وتكەن. اللەرگيا جانە شاڭ-توزاڭنان قورعاۋ تالاپتارىنا ساي. جۇمىس بارىسىندا بارلىق سانيتارلىق-ەپيدەميولوگيالىق جاۋاپكەرشىلىك قاتاڭ ساقتالادى. جازاسىن وتەۋشىلەر ماسكالاردى مۇقتاج جاندارعا كومەك رەتىندە ۇلەستىرىپ بەرۋدە. تۇزەتۋ مەكەمەسىندەگىلەر وبلىستىق پسيحو-نيەۆرولوگيالىق بالالار ينتەرناتىنداعى تاربيلەنۋشىلەرگە 150 ماسكا تىگىپ بەردى. قوعامدى قاۋىپتى ىندەتتەن قورعاۋ ءۇشىن جاسالىپ جاتقان جوباعا جازاسىن وتەۋشىلەر ءوز ەرىكتەرىمەن اتسالىسۋدا»، - دەيدى دەپارتامەنت باس مامانى جاننا قۇسىمبايەۆا.

ەلدە شەكتەۋ شارالارىنىڭ ەنگىزىلۋىنە بايلانىستى قىلمىستىق اتقارۋ جۇيەسىنىڭ بارلىق قۇرامى كۇشەيتىلگەن رەجيمدە قىزمەت ەتۋدە. مۇنداعى مادەني شارالار ۋاقىتشا توقتاتىلدى. ال جازاسىن وتەۋشىلەر تۋىس-تۋعاندارىمەن تەلەفون ارقىلى حابارلاسىپ، بەينەبايلانىس جۇيەسىمەن سويلەسەدى.