اقمولادا ءجۇزۋ بىلمەيتىن ەكى قىز تۋىستارىنىڭ كوز الدىندا وزەنگە اعىپ كەتتى
قايعىلى جاعداي 19- شىلدە كۇنى بولعان. 12 جانە 15 جاسار ەكى جاس ءوسپىرىم قىز تۋىستارىمەن بىرگە شومىلۋعا ارنالماعان جەردە وزەنگە تۇسكەن.
«قىزداردىڭ بىرەۋىنىڭ اكەسى ولاردىڭ اعىپ بارا جاتقانىن بايقاپ قالىپ، كومەككە ۇمتىلعان. الايدا قاتتى اعىس بوي بەرمەي، ەكى قىزدى اعىزىپ اكەتكەن» دەپ ءمالىم ەتتى وبلىستىق توتەنشە جاعدايلار دەپارتامەنتىنىڭ باسپا ءسوز قىزمەتى.
قۇتقارۋشىلار ەكى قىزدىڭ وتباسىنا قايعىرىپ كوڭىل ايتادى. وبلىستىڭ باس قۇتقارۋشىسى الەكسەي سوۆەتوۆتىڭ ايتۋىنشا، شومىلۋ ماۋسىمى باستالعالى وڭىردە 14 ادام سۋعا باتىپ، كوز جۇمعان. ونىڭ تورتەۋى - بالالار.
«اقمولالىقتار سوڭعى كۇندەردەگى اپتاپ ىستىق كەزىندە كارانتينگە قاراماستان سۋعا ءتۇسىپ جاتىر. شومىلۋ كەزىندە قاۋىپسىزدىك تالاپتارىن ساقتاپ، بارىنشا اباي بولۋ كەرەك. ماس كۇيدە شومىلۋعا بولمايدى جانە بالالاردى قاراۋسىز قالدىرماعان ابزال. تەك قانا ارنايى جابدىقتالعان جەردە سۋعا تۇسىڭىزدەر. بەيتانىس جەردە شومىلماڭىزدار جانە قالتقىدان ءارى اسپاعان دۇرىس. جۇزە المايتىندار تەك قانا قۇتقارۋشىلار بەكەتى جۇمىس ىستەپ تۇرعان جاعالاۋدا، تەرەڭدىگى 1,2 مەتردەن اسپايتىن جەردە سۋعا ءتۇسسىن. وسى تالاپتاردى ساقتاۋ ارقىلى ومىرىڭىزگە قاۋىپ تونبەيدى. الگى سۋعا كەتكەن ەكى قىز دا ءجۇزۋ بىلمەيتىن ەدى» دەيدى وبلىستىق توتەنشە جاعدايلار دەپارتامەنتىنىڭ باستىعى.