تۇركيادان قازاقستانعا وكپەنى جاساندى جەلدەتۋ اپپاراتتارى جەتكىزىلدى

الماتى. قازاقپارات - الماتى اۋەجايىنا وكپەنى جاساندى جەلدەتۋ اپپاراتى جيناعىن تاسىمالداعان ۇشاق كەلىپ قوندى، دەپ حابارلايدى قازاقپارات ءتىلشىسى.

وكپەنى جاساندى جەلدەتۋ اپپاراتىن، ىندەتپەن كۇرەستى قولداۋ رەتىندە، قازاقستانعا Beko تۇرمىستىق تەحنيكاسىنىڭ ەۋروپالىق برەندى جىبەردى.

مەديتسينالىق جابدىق تۇركيانىڭ الدىڭعى قاتارلى كاسىپورىندارىمەن ىنتىماقتاستىقتا جوبالانىپ، جاساپ شىعارىلدى. ولار قاۋىپسىزدىكتىڭ بارلىق حالىقارالىق تالاپتارى مەن ستاندارتتارىنا جاۋاپ بەرەدى.

كومپانيا وكىلدەرىنىڭ حابارلاۋىنشا، بيىل كوكتەمدە 120 ينجەنەردەن تۇراتىن توپ بار-جوعى 2 اپتانىڭ ىشىندە ىستانبۇل قالاسىنداعى Arcelik Garage - اشىق يننوۆاتسيالىق ورتالىعىندا اپپاراتتىڭ العاشقى پروتوتيپىن جوبالاپ، تەستىلەۋدەن وتكىزدى. ماۋسىم ايىنىڭ باسىنا قاراي ونىڭ Cerkezkoy electronics ورتالىعىندا كوممەرتسيالىق نەگىزدە ەل ىشىنە جانە ودان تىس جەرلەرگە بەرۋ ءۇشىن 5000 اپپارات جاساپ شىعارىلدى.

وسى يگى باستاما شەڭبەرىندە 5 اپپاراتتى قازاقستان الدى. وكپەنى جاساندى جەلدەتۋ اپپاراتتارى كەدەندىك تەكسەرۋدەن ءوتىپ، قالالىق جەدەل شۇعىل كومەك كورسەتۋ اۋرۋحاناسىنا بەرىلدى.