قازاقستاندا جەدەل جاردەم كولىكتەرىنىڭ ءوندىرىسى قارقىن الدى

قوستاناي. قازاقپارات - قوستانايداعى «سارىارقا اۆتوپروم» زاۋىتى جەدەل مەديتسينالىق جاردەم كولىكتەرىنىڭ ءوندىرىسىن كەڭەيتتى، دەپ حابارلايدى قازاقپارات ءتىلشىسى.

سوڭعى جاعدايلارعا بايلانىستى مەديتسينا قىزمەتكەرلەرىنىڭ جۇكتەمەسى ارتتى. سوعان بايلانىستى قازاقستاننىڭ دەنساۋلىق ساقتاۋ مينيسترلىگى ارنايى تەحنيكا پاركىن ۇلعايتۋ قاجەتتىلىگى تۋرالى حابارلاعانى ءمالىم.

ناتيجەسىندە قوستانايداعى «سارىارقا اۆتوپروم» زاۋىتى جەدەل مەديتسينالىق جاردەم كولىكتەرىنىڭ ءوندىرىسىن كەڭەيتتى.

«بۇعان دەيىن اۆتووندىرۋشى كومپانيا JAC مينيۆەندەرىنىڭ ارنايى تەحنيكاسىن قۇراستىرۋدى جولعا قويعان بولاتىن.

كوروناۆيرۋس پاندەميانىڭ جاعدايلارىن ەسكەرە وتىرىپ، اۆتوموبيلدەردى قايتا جابدىقتاۋ جانە Chevrolet Damas ۇلگىسىن تولىقتىرۋ تۋرالى شەشىم قابىلداندى.

كولىكتەر قازاقستان رەسپۋبليكاسى دەنساۋلىق ساقتاۋ مينيسترلىگىنىڭ تەحنيكالىق سپەتسيفيكاتسياسى بويىنشا شىعارىلدى. جەدەل جاردەم ماشينالارى مەديتسينا قىزمەتكەرلەرىنە ارنالعان. جەدەل، سەنىمدى، قوزعالىسقا ىڭعايلى اۆتوكولىكتەر پايداسىن تيگىزەدى دەگەن ويدامىن.

«سامۇرىق-قازىنا» ۇلتتىق ءال-اۋقات قورى مەن «Kaspi.kz» بانكى جاڭا اۆتوكولىكتەرگە سۇرانىس بەرىپ قويعانىن ايتا كەتەيىك»، - دەپ اتاپ ءوتتى «سارىارقا اۆتوپروم» سەرىكتەستىگىنىڭ ديرەكتورى سىرىم سەمەيبايەۆ.

زاۋىت باسشىلىعى اتاپ وتكەندەي، جيناقى اۆتوكولىك بارلىق سىناقتاردان ءساتتى وتكەن.

مەديتسينالىق كولىكتەر پاتسيەنتتى تاسىمالداۋدا ءتيىمدى. اۆتوموبيلدەر ناۋقاستاردى تاسىمالداۋعا ارنالعان بارلىق قاجەتتى مەديتسينالىق، سانيتارلىق جانە باكتەريتسيدتىك جابدىقتارمەن، سونىڭ ىشىندە وكپەنى جاساندى جەلدەتۋدىڭ پورتاتيۆتى اپپاراتىمەن، ە ك گ-اپپاراتىمەن، پۋلسوكسيمەترمەن جانە دەفيبريللياتورمەن جابدىقتالعان.