قازاقستاندا كوروناۆيرۋستى ەمدەۋ تاكتيكاسىنىڭ وزىندىك ەرەكشەلىگى بار - رەسەي دارىگەرى
«قازاقستان بىزگە ەڭ جاقسى جاعدايدى جاسادى. ءبىز وتە ريزامىز» دەيدى استراحاندىق دارىگەرلەر توبىنىڭ جەتەكشىسى اننا چەپەل.
ول بۇل پىكىرىن caspian-eurasia.com سايتىنا بىلدىرگەن. وتكەن اپتادا اتىراۋ وبلىسىنىڭ اكىمى ماحامبەت دوسمۇحامبەتوۆتىڭ رەسەيدەگى استراحان وبلىسىنىڭ گۋبەرناتورى يگور بابۋشكينمەن اراداعى كەلىسىمىنە سايكەس 5 دارىگەر كەلگەن بولاتىن. قازىر استراحاندىق دارىگەرلەر ءۇش توپقا بولىنگەن.
ولار وبلىستىق، ينفەكتسيالىق اۋرۋحانالار مەن كارديولوگيالىق ورتالىقتا جاساقتالعان گوسپيتالدە جۇمىس ىستەۋدە.
«ءبىزدى ءۇش توپقا ءبولدى. ەكى توپتا ەكەۋدەن، ال ءبىر توپتا ءبىر دارىگەر بار. كەشە «قىزىل» ايماققا كىردىك. ءار دارىگەردىڭ ءوز بولىمشەسى بار. ەمدەۋ تاكتيكاسىنىڭ وزىندىك ەرەكشەلىگى بار. ءبىراق، ايتارلىقتاي كوپ ەمەس. جۇمىس كوپ. ءبىراق، قازاقستاندىق ارىپتەستەرمەن ۇيلەسىمدى جۇمىستىڭ ناتيجەسىندە ءبارى دە رەتتەلىپ جاتىر»، - دەيدى اننا چەپەل.
ونىڭ ايتۋىنشا، استراحاندىق دارىگەرلەر كۇنىنە جەرگىلىكتى ستاندارت بويىنشا 6 ساعات جۇمىس ىستەيدى. دارىگەرلەر ناۋقاستاردى تەكسەرىپ، ەم جۇرگىزەدى.
«قازاقستاندا بىزگە تاماقپەن، جاتىن ورىنمەن قامتۋ باعىتىندا ەڭ جاقسى جاعداي جاسالدى. ءبىز وتە ريزامىز» دەيدى دارىگەر اننا چەپەل.
ەسكە سالا كەتەلىك، بۇدان بۇرىن اتىراۋعا رەسەيدىڭ استراحان وبلىسىنان 5 دارىگەر كەلگەنىن حابارلاعان ەدىك.