بۋرابايدا دەمالۋشىنىڭ كوپتىگىنە بايلانىستى بلوكپوست ورناتۋ ۇسىنىلدى
دەمالىس كۇندەرى «بۋراباي» ۇلتتىق تابيعي پاركىندەگى جاعاجايلاردا ينە شانشار ورىن بولمايدى. دەمالۋشىلاردى سۋعا شومىلۋعا رەسمي تۇردە سالىنعان تىيىم دا، ءتىپتى «جاعاجايلار كارانتينگە بايلانىستى جابىق» دەپ جازىلعان رەسمي تاقتايشا دا توقتاتا المادى.
سانيتارلىق نورمالاردى ساقتاماي، ساقتىق شارالارىن ۇمىتىپ، مىڭداعان دەمالۋشى بوس ۋاقىتىن جاعاجايدا وتكىزۋدە.
جاۋاپتى تۇلعالار مەن پوليتسيا قىزمەتكەرلەرى رەيد جۇرگىزۋدە، ءبىراق تۋريستەر ولاردان قايمىقپايدى. بۋرابايداعى ارنايى جابدىقتالماعان بىرنەشە شاقىرىم جاعاجاي ادامعا تولى. سانيتارلىق نورما، ماسكا رەجىمى مەن الەۋمەتتىك قاشىقتىق تۋرالى ءسوز قوزعاۋدىڭ ءوزى قيىن.
پوليتسەيلەر رەيد كەزىندە تەكسەرىپ جاتىر. الايدا، كارانتيندى بۇزۋشىلاردىڭ كوپشىلىگىنە اۋىزشا ەسكەرتۋ عانا ايتىلادى.
شەكتەۋ شارالارى ەنگىزىلگەن ساتتەن باستاپ 8 ادامعا عانا ايىپپۇل سالىنعان.
«ولاردان جازباشا تۇسىنىكتەمە، جەكە كۋالىكتىڭ كوشىرمەسى الىنادى، اكىمشىلىك ماتەريالدار راسىمدەلىپ، اقپاراتتى ەسەپكە الۋ كىتابىنا (ا ە ك) تىركەلەدى، سودان كەيىن ءىستى تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ بولىمىنە تاپسىرادى. بۇل مەكەمەنىڭ قىزمەتكەرلەرى اكىمشىلىك حاتتاما تولتىرادى. بۇل 2 دەن 3 ساعاتقا سوزىلادى»، - دەدى بۋراباي اۋدانى اكىمى اپپاراتىنىڭ باسشىسى قاسىمحان ماجىكوۆ.
«ادامدار جاۋاپكەرشىلىكتى سەزىنبەگەندىكتەن وسىنداي جاعداي قالىپتاستى. مەنىڭ ويىمشا، ونى توقتاتۋدىڭ جالعىز عانا جولى - ت ج رەجىمىندەگىدەي بلوكپوست قويۋ»، - دەدى اۋداننىڭ باس سانيتار دارىگەرى سەرالى جولداسپايەۆ.