الەم ەلدەرى كارانتيندى قايتا كۇشەيتىپ جاتىر
بۇعان دەيىن دۇنيەجۇزىلىك دەنساۋلىق ساقتاۋ ۇيىمى (د س ۇ) كوپتەگەن ەلدەردە جاعداي ناشارلاپ بارا جاتقانىن مالىمدەگەن بولاتىن، دەپ حابارلايدى قازاقپارات BBC اگەنتتىگىنە سىلتەمە جاساپ.
امەريكانىڭ كاليفورنيا شتاتىندا بارلىق مەيرامحانا، كوڭىل كوتەرۋ ورىندارى، حايۋاناتتار باعى مەن مۇراجايلار جابىلدى.
ءۇندىستاننىڭ بانگالور قالاسىندا ءبىر اپتالىق كارانتين ەنگىزىلدى.
يران استاناسى تەگەراندا دا كارانتين جەتى كۇنگە ۇزارتىلدى.
ۋنيۆەرسيتەتتەر، مەكتەپتەر، كىتاپحانالار، سۇلۋلىق سالوندارى، مەشىتتەر، كينوتەاترلار، تەاترلار مەن مۇراجايلار جابىلدى.
بارلىق مادەني-كوڭىل كوتەرۋ جانە ءدىني شارالار ۋاقىتشا توقتاتىلدى.
گونكونگتا تۇرعىندارعا الەۋمەتتىك قاشىقتىقتى ساقتاۋ تۋرالى شەشىم ۇيعارىلدى. اشىلعانىنا ءبىر اي بولعان «ديسنەيلەند» تاعى دا جابىلدى.
موروككودا تانجەر قالاسىندا كارانتين ەنگىزىلدى.
وڭتۇستىك افريكا رەسپۋبليكاسىندا كومەندانتتىق ساعات ءجۇرىپ جاتىر.
كولۋمبيا استاناسى بوگوتانىڭ كەيبىر اۋداندارىندا ەكى اپتالىق كارانتين ەنگىزىلگەن.
اۋستراليانىڭ 5 ميلليونعا جۋىق تۇرعىنى بار مەلبۋرن قالاسى التى اپتالىق كارانتيندە. قالا ورنالاسقان ۆيكتوريا شتاتى كورشىلەس جاڭا وڭتۇستىك ۋەلس جانە وڭتۇستىك اۆستراليا شتاتتارىمەن شەكارالارىن جاپتى.
يزرايل مەن باتىس جاعالاۋدا شەكتەۋ ەنگىزىلگەن.
وزبەكستاندا كارانتين 10- شىلدەدەن باستاپ ەنگىزىلگەن. ول 1- تامىزعا دەيىن جالعاسادى.
انگليادا 24- شىلدەدەن باستاپ دۇكەنگە كەلۋشىلەر ماسكا تاعۋعا مىندەتتەلەدى، دەپ مالىمدەدى بريتانيانىڭ دەنساۋلىق ساقتاۋ ءمينيسترى مەتت حەنكوك.
ەرەجەنى بۇزعاندار ءۇشىن 100 فۋنت (125 دوللار) كولەمىندە ايىپپۇل قاراستىرىلعان. بۇعان دەيىن عالىمدار ارەكەتسىزدىك جاعدايىندا كوروناۆيرۋستىڭ ەكىنشى تولقىنى تاعى 120 مىڭ بريتاندىق ازاماتتىڭ ءومىرىن قيىپ اكەتۋى مۇمكىن دەپ ەسكەرتكەن ەدى.
بريتانيادا Covid-19 ۆيرۋسىنان 45 مىڭعا جۋىق ادام قايتىس بولدى. بۇل - ەۋروپاداعى ەڭ جوعارى كورسەتكىش. ىندەت جۇقتىرۋ وقيعالارىنىڭ سانى جاعىنان ەكىنشى ورىندا برازيليا تۇر.
اپتانىڭ سوڭىنا قاراي وندا پاندەميا باستالعاننان بەرى اۋرۋ جۇقتىرعاندار سانى 2 ميلليون ادامنان اسۋى ىقتيمال.