تۇركىستاندىق ۆولونتەرلەر اۋداندىق اۋرۋحاناعا كومەكتەستى

تۇلكىباس. قازاقپارات - تۇركىستان وبلىسىنىڭ تۇلكىباس اۋدانىندا جۇرتتى ابىگەرگە سالعان كوروناۆيرۋس ىندەتىمەن كۇرەستە جومارت جاندار بارىنشا اتسالىسۋدا.

اۋداننىڭ ەرىكتى تۇرعىندارى ورتالىق اۋرۋحاناعا قازىرگى تاڭدا تازالىق ءۇشىن اسا قاجەتتى اۆتوماتتاندىرىلعان 5 كىر جۋۋ ماشيناسىن تارتۋ ەتتى، دەپ حابارلايدى قازاقپارات ءتىلشىسى.

سونداي-اق، ەلدى مەكەندەردە كەڭ جۇرەكتى ازاماتتار مۇقتاج وتباسىلارعا قولدان كەلگەن كومەكتەرىن اياماۋدا.

سوڭعى ەكى كۇندە اۋدانعا قاراستى ابايىل مەن جاسكەشۋ اۋىلىنىڭ تۇرعىندارى قارجى جيناپ، 30 جانۇياعا قۇرباندىققا شالىنعان 2 ءىرى قارا مەن 2 قويدىڭ ەتىن ءبولىپ بەردى. تۇرمىسى تومەن وتباسىلارعا ەتپەن قوسا، ءبىرىنشى قاجەتتىلىكتەگى ازىق-تۇلىك بەرىلدى.

ايتا كەتەيىك، بۇعان دەيىن تۇلكىباستىق دەمەۋشىلەر مەن ەرىكتىلەر ورتالىق اۋرۋحاناعا 210 وتتەگى بالونىن تارتۋ ەتكەن بولاتىن.

ال، اۋدان اكىمدىگى ۆولونتەرلەرگە اۋرۋحانانىڭ باللوندارىن وتتەگىمەن تولتىرىپ كەلۋ ءۇشىن گازەل اۆتوكولىگىن بولگەن بولاتىن.

سونىمەن قاتار، بارلىق اۋىلدىق وكرۋگ، كەنت اكىمدەرى وزدەرىنىڭ قىزمەتتىك كولىكتەرى مەن جۇرگىزۋشىلەرىن اق حالاتتى ابزال جاندارعا بەرىپ، بۇگىندە 17 كولىكپەن دارىگەرلەردى ناۋقاستارعا تاسىمالداۋدا.