قورعانىس ءمينيسترىنىڭ ورىنباسارى باقىت قۇرمانبايەۆ دۇنيەدەن وزدى
قورعانىس مينيسترلىگى رەسمي سايتىنىڭ حابارلاۋىنشا، باقىت جانۇزاق ۇلىنىڭ ارتىندا جان جارى مەن ەكى بالاسى قالدى.
باقىت قۇرمانبايەۆ 1993-جىلى ءال-فارابي اتىنداعى قازاق مەملەكەتتىك ۋنيۆەرسيتەتىن ءتامامداعان. 2005-جىلى رەسەي فەدەراتسياسى قۇرلىق اسكەرلەرى اسكەري اۋە شابۋىلىنا قارسى قورعانىس اسكەري اكادەمياسىندا ءبىلىم الىپ، ال 2008-جىلى رەسەي فەدەراتسياسى قارۋلى كۇشتەرى باس شتابى اسكەري اكادەمياسىنىڭ جوعارى اكادەميالىق كۋرسىن بىتىرگەن.
باقىت جانۇزاق ۇلى قازاقستان رەسپۋبليكاسى قارۋلى كۇشتەرىندە اتقارعان قىزمەتىندە جوعارى كاسىبيلىگىمەن جانە اۋقىمدى تاجىريبەسىمەن ەرەكشەلەندى. اسكەري سالادا قوندىرعىلاردى قوسۋ ۆزۆودىنىڭ، زەنيتتىك-زىمىران باتارەياسىنىڭ كومانديرىنەن باستاپ ءار جىلدارى قورعانىس مينيسترلىگىندە باسشىلىق لاۋازىمداردى، سونىمەن قاتار قازاقستان رەسپۋبليكاسى قاۋىپسىزدىك كەڭەسى اسكەري قاۋىپسىزدىك جانە قورعانىس ءبولىمىنىڭ مەڭگەرۋشىسى لاۋازىمىن اتقاردى.
2017-جىلعى 6- مامىردا پرەزيدەنت جارلىعىمەن وعان «گەنەرال-مايور» اسكەري اتاعى بەرىلگەن ەدى.
2019-جىلعى ءساۋىر ايىندا گەنەرال-مايور قۇرمانبايەۆ قازاقستان رەسپۋبليكاسى قورعانىس ءمينيسترىنىڭ ورىنباسارى بولىپ تاعايىندالدى. ماتەريالدىق-تەحنيكالىق قامتاماسىز ەتۋ، قورعانىس ونەركاسىپ كەشەنىمەن ءوزارا ءىس-قيمىل جاساۋ، قارۋ-جاراق جانە اسكەري تەحنيكا، سونداي-اق تىلدىق جانە مەديتسينالىق قامتاماسىز ەتۋ ماسەلەلەرىنە جەتەكشىلىك ەتتى.
ارىس قالاسىنداعى توتەنشە جاعداي سالدارىن جويۋدا ايتارلىقتاي ۇلەس قوسىپ، پاندەميامەن كۇرەس كەزەڭىنىڭ العاشقى كۇندەرىنەن باستاپ ينفەكتسيانىڭ تارالۋىنا قارسى ءىس-شارالاردى ۇيىمداستىرۋ مەن قامتاماسىز ەتۋگە بەلسەندى اتسالىستى.
قىزمەت اتقارعان كەزەڭدەردە II دارەجەلى «ايبىن» جانە II دارەجەلى «داڭق» وردەندەرىمەن ماراپاتتالعان.
قازاقستان رەسپۋبليكاسى قورعانىس مينيسترلىگىنىڭ باسشىلىق قۇرامى مەن اسكەري قىزمەتشىلەرى گەنەرال-مايور باقىت جانۇزاق ۇلى قۇرمانبايەۆتىڭ مەزگىلسىز قايتىس بولۋىنا بايلانىستى تۋىستارى مەن جاقىندارىنا قايعىرىپ كوڭىل ايتادى.