جاڭاارقا تۇرعىندارى ناۋقاستار مەن دارىگەرلەرگە قىمىز جيناۋدا

قاراعاندى. قازاقپارات - قاراعاندى وبلىسى جاڭاارقا اۋدانىنىڭ تۇرعىندارى قىمىز بەن ساۋمال جيناپ، بۇل ونىمدەردى ءوڭىردىڭ مەديتسينالىق مەكەمەلەرىنە جىبەرۋدە، دەپ حابارلايدى قازاقپارات ءوڭىر باسشىسىنىڭ رەسمي سايتىنا سىلتەمە جاساپ.

بۇل سۋسىندار يممۋنيتەتتى ساقتاۋ ءۇشىن اسا پايدالى. جاڭاارقالىقتار وبلىس ستاتسيونارلارىنىڭ ەمدەلۋشىلەرى مەن مەديتسينالىق قىزمەتكەرلەرى ءۇشىن قىمىز مەن ساۋمال جيناۋ بويىنشا ارنايى ناۋقان ۇيىمداستىردى.

وسىلايشا، ەرىكتىلەر بىرنەشە قايىرىمدىلىق ءىس-شارالارىن وتكىزدى.

«ءبىز بىرگەمىز» اكتسياسى اياسىندا بەس اۋىلدىق وكرۋگتە 1600 ليتر ساۋمال مەن 1700 ليتر قىمىز جينالدى. ءسۇت سۋسىندارى اۋدان اۋرۋحانالارىنا، سونداي-اق قاراعاندى جانە جەزقازعان مەديتسينالىق مەكەمەلەرىنە جەتكىزىلدى.

«جاڭاارقا جاستارى اۋىلدان اۋىلعا ءجۇرىپ، شيپالى قاسيەتتەرگە تولى قىمىز سۋسىنىن جيناۋدا. ونى ءبىز قاراعاندى وبلىسىنىڭ بارلىق اۋرۋحانالارىنا جەتكىزەمىز. بۇل سۋسىندار ناۋقاستاردىڭ قالپىنا كەلىپ، ساۋىعىپ كەتۋىنە كومەكتەسىپ، قازىرگى تاڭدا پاندەميامەن كۇرەسىپ جاتقان الدىڭعى قاتارداعى دارىگەرلەرگە كۇش-قۋات بەرگەنىن قالايمىز»، - دەيدى جاڭاارقالىقتار.

بۇگىن تۇگىسكەن اۋىلىنان قىمىز اتاسۋ اۋىلىنا، تەمىرتاۋ مەن جەزقازعانعا جەتكىزىلەدى. سونداي-اق اۋدان تۇرعىندارى وتتەگى باللوندارى مەن ءو ج ج اپپاراتتارىن ساتىپ الۋ ءۇشىن اقشا جينايدى.

مىسالى، جاڭاارقا كاسىپكەرلەرى جانسۇلتان قاسىمبەكوۆ پەن سەرىك تويىمبايەۆ ستاتسيونارلارعا 103 وتتەگى باللونىن جەتكىزۋدى قولدادى، ال گانيسلام رسالدين ولارعا ارنالعان رەدۋكتورلاردى ساتىپ الۋعا كومەكتەستى.