ەلباسى نۇر- سۇلتان مەن الماتىدا ەكى مەديتسينالىق ورتالىق سالۋدى تاپسىردى
كەزدەسۋ بارىسىندا ەلباسى قازىرگى ەكونوميكالىق داعدارىستىڭ قوردىڭ بارلىق كومپانيالارىنا اسەر ەتكەنىن اتاپ ءوتتى. ا. ەسىموۆتىڭ مالىمەتى بويىنشا، قوردىڭ كومپانيالار توبى قىزمەتكەرلەردىڭ قىسقارۋىنا جول بەرگەن جوق، بارلىق كاسىپورىن جۇمىسىن جالعاستىرۋدا. سونىمەن قاتار «سامۇرىق- قازىنا» ۇلتتىق ءال- اۋقات قورى» اكسيونەرلىك قوعامى باسقارماسىنىڭ ءتوراعاسى وتاندىق دەنساۋلىق ساقتاۋ جۇيەسىن قولداۋ بويىنشا جۇرگىزىلىپ جاتقان جۇمىستار تۋرالى باياندادى.
قازاقستاننىڭ تۇڭعىش پرەزيدەنتى «سامۇرىق- قازىنا» اكسيونەرلىك قوعامىنىڭ كوروناۆيرۋس پاندەمياسىنا قارسى كۇرەسكە بارىنشا اتسالىسۋ قاجەتتىگىن اتاپ ءوتتى.
- قوردى باسقارۋ جونىندەگى كەڭەستىڭ ءتوراعاسى رەتىندە «سامۇرىق- قازىنانىڭ» ىشكى رەزەرۆتەرىنەن ءىرى مەگاپوليستەردە - نۇر-سۇلتان جانە الماتى قالالارىندا ەكى مەديتسينالىق ورتالىقتىڭ قۇرىلىسىنا قاراجات ءبولۋدى تاپسىرامىن. مەديتسينالىق ورتالىقتاردىڭ جۇمىسى عىلىمي- زەرتتەۋ الەۋەتىن كۇشەيتۋگە باعىتتالادى. بۇل قادام كەلەر ۇرپاقتى ىقتيمال قاتەرلەردەن ساقتاپ قالۋعا مۇمكىندىك بەرەدى. ۇكىمەت پەن اكىمدەر بۇل باستامانى قولدايدى دەگەن سەنىمدەمىن»، - دەدى نۇرسۇلتان نازاربايەۆ.
كەزدەسۋ سوڭىندا قازاقستاننىڭ تۇڭعىش پرەزيدەنتى كوروناۆيرۋس ىندەتىنەن قايتىس بولعانداردىڭ وتباسىلارىنا تاعى دا كوڭىل ايتىپ، قازاقستاندىقتاردى بارلىق قاجەتتى قاۋىپسىزدىك شارالارىن قاتاڭ ساقتاۋعا شاقىردى.