پاندەميا كەزىندە اشتىقتان زارداپ شەككەندەر سانى ارتتى - حالىقارالىق ۇيىمدار
كوروناۆيرۋس پاندەمياسى جاعدايدى ۋشىقتىرۋدا، دەپ حابارلايدى قازاقپارات dw.com/ru اگەنتتىگىنە سىلتەمە جاساپ.
الەمدە اشتىقتان زارداپ شەككەندەردىڭ سانى ارتۋدا. بۇل تۋرالى دۇيسەنبى كۇنى جاريالانعان بۇۇ بالالار قورى (يۋنيسەف) ، دۇنيەجۇزىلىك دەنساۋلىق ساقتاۋ ۇيىمى (د س ۇ) ، ب ۇ ۇ ازىق- تۇلىك جانە اۋىلشارۋاشىلىق ۇيىمى (ف ا و) جانە باسقا دا ۇيىمدار دايىنداعان باياندامادا ايتىلعان. 2019 -جىلى جەر بەتىندەگى 690 ميلليون ادام تاماققا جارىماي وتىر، دەلىنگەن قۇجاتتا. بۇل ءبىر جىل بۇرىنعىدان 10 ميلليون ادامعا كوپ، ال بەس جىل بۇرىنعى كورسەتكىشتەن 60 ميلليونعا كوپ. سونىمەن قاتار، 2019 -جىلى «ازىق- تۇلىكتىڭ ورتاشا نەمەسە مول كولەمدە جەتىسپەۋىنەن» زارداپ شەككەندەردىڭ سانى شامامەن 2 ميلليارد ادامدى قۇراعان، دەپ حابارلادى بايانداما اۆتورلارى.
كوروناۆيرۋس پاندەمياسى جاعدايدى ودان سايىن ۋشىقتىردى دەيدى ماماندار. پاندەميادان تۋىنداعان جاھاندىق داعدارىس وندىرىستىك تىزبەكتەرگە عانا ەمەس، سونىمەن قاتار جەر بەتىندەگى تاماق ونىمدەرىنىڭ تارالۋى مەن تۇتىنىلۋىنا دا اسەر ەتتى.
«COVID-19 پاندەمياسىنىڭ دەنساۋلىققا، الەۋمەتتىك جانە ەكونوميكالىق سالالارعا اسەرى ازىق- تۇلىك قاۋىپسىزدىگى دەڭگەيىنىڭ ودان ءارى تومەندەۋىنە جانە ەڭ وسال توپتاردىڭ تاماقتانۋ جاعدايىنىڭ ناشارلاۋىنا اكەلۋى مۇمكىن»، دەپ ەسكەرتتى ب ۇ ۇ.
ەگەر قازىرگى ءۇردىس جالعاساتىن بولسا، وندا 2030 -جىلعا قاراي الەمدە اشىققاندار سانى 840 ميلليون بولۋى مۇمكىن. بۇل جاعدايدا، اسىرەسە، بالالار قاتتى زارداپ شەگەدى. بايانداما اۆتورلارىنىڭ مالىمەتتەرى بويىنشا، ازىق- تۇلىكتىڭ جەتىسپەۋىنە بايلانىستى 2019 -جىلى الەمدەگى 5 جاسقا دەيىنگى ءاربىر بەسىنشى بالانىڭ (21 پايىز) دامۋىندا اقاۋلار بولعان. وسى جاستاعى بالالاردىڭ شامامەن 7 پايىزى اشتىقتان السىرەگەن. ب ۇ ۇ باعالاۋى بويىنشا اشتىقتان زارداپ شەككەن ادامداردىڭ كوپشىلىگى، 381 ميلليون ادام ازيادا تۇرادى. افريكادا - 250 ميلليون، لاتىن امەريكاسىندا جانە كاريب ايماعىندا - 48 ميلليون سونىمەن قاتار، قۇنارلى جانە پايدالى تاعامنىڭ باعاسىنا بايلانىستى ماسەلە ب ۇ ۇ ساراپشىلارىنىڭ نازارىن اۋداردى.
«دۇرىس تاماقتانۋ الەمنىڭ بىرنەشە ايماعىنداعى كوپتەگەن ادامعا، اسىرەسە كەدەيلەرگە قول جەتىمدى ەمەس»، - دەلىنگەن باياندامادا. اۆتورلاردىڭ پىكىرىنشە، كوكونىستەر، جەمىستەر مەن اقۋىزعا باي تاعامداردان تۇراتىن دۇرىس تاماقتانۋ ءمازىرى تەك نەگىزگى ازىق- تۇلىكتەردەن بەس ەسە قىمبات. ەكىنشى جاعىنان، باياندامادا كورسەتىلگەندەي، 2019 -جىلى الەمدە بەس جاسقا دەيىنگى بالالاردىڭ 5,6 پايىزى ارتىق سالماقتان زارداپ شەككەن. ب ۇ ۇ ساراپشىلارى سەمىزدىككە شالدىققان ادامداردىڭ ۇلەسى الەمنىڭ بارلىق ايماقتارىندا ءوسىپ كەلە جاتقانىن اتاپ ءوتتى.