اسحات ايماعامبەتوۆ: جاڭا وقۋ جىلىندا قاشىقتان وقىتۋعا بارلىق جاعداي جاسالادى
بۇل تۋرالى ورتالىق كوممۋنيكاتسيالار قىزمەتىندە ونلاين وتكەن بريفينگتە ق ر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«مەملەكەت باسشىسى قاسىم- جومارت توقايەۆ ۇكىمەتكە، ءبىلىم جانە عىلىم مينيسترلىگىنە، اكىمدىكتەرگە جاڭا وقۋ جىلىن ۇيىمداستىرۋ بويىنشا بىرنەشە تاپسىرما بەرگەن بولاتىن. وسى تاپسىرمالار اياسىندا جۇمىس قارقىندى ءجۇرىپ جاتىر. جاڭا عانا ۇكىمەت وتىرىسىندا وسى ماسەلەنى بولەك قاراپ، ءتيىستى شەشىم قابىلداندى»، - دەدى ءبىلىم جانە عىلىم ءمينيسترى اسحات ايماعامبەتوۆ.
ونىڭ ايتۋىنشا، باستى ماسەلە - بالالار مەن پەداگوگتاردىڭ قاۋىپسىزدىگى، ولاردىڭ دەنساۋلىعى.
«قازىر احۋال قيىن. دەنساۋلىق ساقتاۋ مينيسترلىگى بەرگەن مالىمەتتى قارايتىن بولساق، قىركۇيەك، كۇز ايلارىندا جىلدا بولاتىن جرۆي ينفەكتسياسى دا تارالادى. بارلىق ماسەلەنى قاراستىرا وتىرىپ، بۇگىن ءتيىستى شەشىم قابىلدادىق. 1 - قىركۇيەكتەن باستاپ ەلىمىزدەگى بارلىق مەكتەپتەر قاشىقتان وقۋ فورماتىنا كوشەدى. ارينە، بۇل وتە كۇردەلى شەشىم. قازىرگى ۋاقىتتا قوعامدا وسى ماسەلەگە قاتىستى بىرنەشە وي، ۇسىنىم بار. وسى شەشىمدى قابىلداماس بۇرىن ساراپشىلارمەن سويلەسىپ، پىكىرلەرىن تىڭدادىق. اتا- انالاردىڭ دا پىكىرىن تىڭداپ، حالىقارالىق تاجىريبەنى زەردەلەدىك. ەڭ باستىسى - بۇگىنگى كۇنگى احۋال. بىزگە كەرەگى - بالالاردىڭ، اتا- انالاردىڭ، پەداگوگتاردىڭ دەنساۋلىعى، سوندىقتان وسىنداي شەشىم قابىلداپ وتىرمىز. 1 - قىركۇيەكتەن باستاپ 1-11- سىنىپ ارالىعىنداعى وقۋشىلار قاشىقتان وقيدى. ولارعا بارلىق ءتيىستى جاعدايدى جاساپ بەرۋىمىز كەرەك»، - دەدى ول.