شالعاي اۋىلدارداعى شاعىن مەكتەپتەردە ساباقتار ادەتتەگى تارتىپپەن وتە بەرەدى - مينيستر

نۇر- سۇلتان. قازاقپارات - ەگەر اتا- انالاردىڭ وتىنىشتەرى بولسا، باستاۋىش سىنىپتار بويىنشا ۋاقىتشا سىنىپتاردى اشىپ بەرۋگە دايىنبىز.

بۇل تۋرالى ورتالىق كوممۋنيكاتسيالار قىزمەتىندە وتكەن ونلاين- بريفينگتە ق ر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.

«1 -قىركۇيەكتەن باستاپ ەلىمىزدەگى بارلىق مەكتەپ قاشىقتان وقيدى. وسىعان قاتىستى 1-2 كىشىگىرىم ماسەلەنى ايتىپ وتەيىن. بىرىنشىدەن، قاشىقتان وقىتۋ فورماتىن ەنگىزەمىز دەپ ايتقاننىڭ وزىندە بىزدە شالعايداعى اۋىلداردا شاعىن جيناقتى مەكتەپتەر بار. ولاردا 5, 10, 15 بالا بار. ولار ءوز مەكتەپتەرىنە جاياۋ بارىپ جۇرەدى. وسىنداي قاۋىپ جوق وڭىرلەردە ورنالاسقان مەكتەپتەردە شتاتتى رەجيمدە ءارى قاراي وقىتۋعا، جۇمىس ىستەۋگە مۇمكىندىك بەرىپ وتىرمىز»، - دەيدى ءبىلىم جانە عىلىم ءمينيسترى اسحات ايماعامبەتوۆ. ونىڭ ايتۋىنشا، ەكىنشى ماسەلە باستاۋىش سىنىپ وقيتىن وقۋشىلارعا قاتىستى.

«ەگەر اتا- انالاردىڭ وتىنىشتەرى بولسا، ناقتى وسى باستاۋىش سىنىپتار بويىنشا ۋاقىتشا سىنىپتاردى اشىپ بەرۋگە دايىنبىز. وسىنداي سىنىپتار اشقاندا ءتيىستى جاعداي جاساۋىمىز قاجەت. سانيتارلىق تالاپتارعا ساي بارلىق جۇمىس جۇرگىزىلەتىن بولادى. بالا تاڭەرتەڭ ساباققا كەلگەندە دەنە قىزۋىن ولشەۋ، ونى زالالسىزداندىرۋ ماسەلەسىن قولعا الۋ بويىنشا، سىنىپتاردى بىرنەشە اۋىسىمعا ءبولۋ ماسەلەسىن قاراستىراتىن بولامىز. سىنىپتا 10-15 بالا عانا بولىپ، ياعني سىنىپتاردى بىرنەشەگە ءبولىپ وقىتۋ ماسەلەسىن قاراستىرامىز»، - دەيدى ول.