پرەزيدەنت تاپسىرماسى: ەكونوميكانى قولداۋدىڭ قوسىمشا شارالارى ازىرلەنەدى
«مەملەكەت باسشىسى ەكونوميكا سالالارىن قولداۋدىڭ قوسىمشا شارالار پاكەتىن قالىپتاستىرۋ جونىندە تاپسىرما بەردى. وسى تاپسىرمانى ورىنداۋ ءۇشىن ۇكىمەت پەن ۇلتتىق بانكتىڭ بىرلەسكەن ءىس-قيمىل جوسپارى قالىپتاستىرىلادى. جوسپار جوباسىن ەكونوميكالىق ساياسات جونىندەگى كەڭەستە قاراستىرىپ، كەڭەس ماقۇلداعان جاعدايدا بەكىتۋ ۇسىنىلادى»، - دەدى رۋسلان دالەنوۆ ۇكىمەت وتىرىسىندا.
ءمينيستردىڭ ايتۋىنشا، تىكەلەي ينۆەستيتسيالار بويىنشا تۇراقتى ورتانى قالىپتاستىرۋ ماقساتىندا ستراتەگيالىق ينۆەستورلار ءۇشىن شارتتاردى ساقتاۋدىڭ تۇراقتىلىعىن قامتاماسىز ەتۋ ماڭىزدى. سول ءۇشىن زاڭناماعا ءتيىستى وزگەرىستەر ءماجىلىستىڭ قاراۋىنا ەنگىزىلمەك.
«مەملەكەتتىك كومپانيالاردىڭ بيۋجەتكە ديۆيدەندتەردى تولەۋدى تۇراقتى نەگىزدە ارتتىرۋ ماسەلەسى زەردەلەنەدى. جۇرگىزىلگەن تالداۋ نەگىزىندە ءتيىستى نورماتيۆتىك قۇقىقتىق اكت ازىرلەنەتىن بولادى»، - دەدى ول.
ەسكە سالا كەتسەك، ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ ۇكىمەت پەن ۇلتتىق بانككە جاعداي ۋشىققاندا حالىق پەن سالالاردى قولداۋدىڭ قوسىمشا شارالار پاكەتىن ازىرلەۋدى تاپسىرعان بولاتىن.