ماماندار قازاقستاندىقتاردىڭ شەتەلدەن كەلۋ ەرەجەلەرىن ءتۇسىندىردى

نۇر- سۇلتان. قازاقپارات - سانيتار دارىگەرلەر قازاقستاندىقتاردىڭ شەتەلدەن كەلۋ ەرەجەلەرىن ءتۇسىندىردى.

تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىندەگىلەردىڭ ايتۋىنشا، ءار ازامات ۇيىنە قايتۋ نە قايتپاۋدى ءوزى شەشەدى، - دەپ حابارلايدى Tengrinews.kz ءتىلشىسى.

سانيتار دارىگەرلەر قازاقستاندىق تۋريستەر ۇيىنە كەلگەن كەزدە كارانتين شارالارىن ورىنداۋ كەرەگىن ەسكەرتتى.

بۇل ەرەجەلەر ق ر باس مەملەكەتتىك سانيتار دارىگەردىڭ 2020-جىلعى 24- ماۋسىمداعى قاۋلىسىندا جازىلعان.

قۇجاتتا دەنە قىزۋى كوتەرىلگەن تۇلعالار ەكى تاۋلىككە پروۆيزورلىق ستاتسيونارعا جاتقىزىلاتىنى جازىلعان. سول ۋاقىت ارالىعىندا ودان COVID-19 انىقتايتىن تەست الىنادى. ەگەر وڭ ناتيجە شىقسا، وندا ينفەكتسيالىق ستاتسيونارعا اۋىستىرىلادى. ال قالعان جولاۋشىلارعا كوروناۆيرۋستىڭ سيمپتومدارى بولۋى مۇمكىن دەپ ەسكەرتىلەدى.

مۇنداي ەرەجەلەر ت م د ەلدەرىنەن تەمىرجول، تەڭىز، وزەن جانە اۆتوموبيل كولىگىمەن كەلەتىندەرگە دە قاتىستى بولادى.

حالىقارالىق رەيستەردە كەلگەن، ءبىراق COVID-19 انىقتايتىن تەستى جوق جولاۋشىلارعا 48 ساعات ىشىندە پ ت ر تەست تاپسىرۋ مىندەت ەكەنى تۋرالى حابارلاما بەرەدى. سونداي-اق جولاۋشىلار كەلگەن قالاسىندا 14 كۇن بويى ۇيدەگى كارانتيندە قالۋى كەرەك.

«ءتيىستى ايماقتىڭ كولىكتەگى باس مەملەكەتتىك سانيتار دارىگەرىنىڭ ايماقتاعى جانە الەمدەگى ەپيدەميولوگيالىق جاعدايعا بايلانىستى شەتەلدەن كەلگەن جولاۋشىلاردى كارانتينگە جاتقىزۋ تۋرالى شەشىم شىعارۋعا قۇقىعى بار»، - دەپ جازىلعان قۇجاتتا.

ايتا كەتەيىك، شەتەلدەن كەلگەن جولاۋشىلار تۋرالى بارلىق دەرەك ق ر دەنساۋلىق ساقتاۋ مينيسترلىگىنىڭ ارنايى ينتەرنەت-قوسىمشاسىندا جيناقتالادى.