الەم جۇرتشىلىعى كوروناۆيرۋستان قايتىس بولعانداردى قالاي ازا تۇتتى؟
وسىعان وراي الەمنىڭ ءبىرقاتار ەلىندە كوروناۆيرۋس ىندەتىنەن قازا تاپقانداردى ەسكە الۋعا ارنالعان قارالى جيىن ءوتتى، دەپ حابارلايدى قازاقپارات ءتىلشىسى.
قىتايدا ادامداردى قۇتقارىپ قالۋ ءۇشىن ءوز ءومىرىن قۇربان ەتكەن دارىگەرلەر مەن كوروناۆيرۋستان قازا تاپقان ازاماتتاردى جالپى ۇلتتىق ازا تۇتۋ كۇنى 4- ساۋىردە ءوتتى.
قىتاي تۇرعىندارى جاڭا كوروناۆيرۋستان قازا تاپقانداردى ءۇش مينۋت ۇنسىزدىكپەن ازا تۇتتى. ازا تۇتۋ بەلگىسى رەتىندە دابىل قاعىلىپ، اۆتوموبيلدەر، پويىزدار مەن كەمەلەر گۋدوكتارىن قوستى. بۇكىل ەلدە تۋ تومەن ءتۇسىرىلىپ، بارلىق ويىن-ساۋىق جانە قوعامدىق شارالارعا تىيىم سالىندى.
ق ح ر- دىڭ ۆەدومستۆولىق، ۇلتتىق باق جانە قىتاي ىزدەۋ سايتتارى ۆيرۋستان قازا تاپقانداردى ازا تۇتۋعا بايلانىستى قارا-اق تۇسپەن بەزەندەندىرىلدى.
قۇرلىقتىق قىتايدا كوروناۆيرۋس جۇقتىرعانداردىڭ سانى 85,5 مىڭ ادامنان استى.
ەۋروپادا كوروناۆيرۋس ىندەتىنىڭ تارالۋى يتاليا مەن يسپانيادا باستالدى. 31- ناۋرىز كۇنى يتاليادا ازا تۇتۋ بەلگىسى رەتىندە مەملەكەتتىك عيماراتتاردا، مەكتەپتەر مەن مۋنيتسيپاليتەتتەردە تۋ تومەن ءتۇسىرىلدى. ەل قازا تاپقانداردى ءبىر مينۋت ۇنسىزدىكپەن ەسكە الدى.
ۆاتيكان دا يتاليا جۇرتشىلىمەن بىرگە ەكەندىگىن ءبىلدىرىپ، سول كۇنى مەملەكەتتىك تۋدى تومەن تۇسىرگەن ەدى. كوروناۆيرۋستىڭ تارالۋى ەلدىڭ سولتۇستىگىندە، لومبارديا وڭىرىندە 21- اقپان كۇنى تىركەلدى. سودان كەيىن ۆيرۋس بۇكىل يتالياعا تاراپ كەتتى.
ىندەت ەڭ العاش تىركەلگەن ساتتەن بەرى بۇل ەلدە 243 ادامدا كوروناۆيرۋس تابىلىپ، 34,9 مىڭ ادام قازا تاپتى.
مامىر مەن ماۋسىم ايلارىندا وتكەن يتاليا مەن گەرمانياداعى فۋتبول چەمپيوناتىنىڭ بىرنەشە ويىنى ىندەتتەن قازا تاپقانداردى ءبىر مينۋت ۇنسىزدىكپەن ەسكە الۋدان باستالدى. 27- مامىردا يسپانيا دا Covid-19 قۇرباندارىن ءبىر مينۋت ۇنسىزدىكپەن ەسكە الدى.
بۇكىل ەل تۇرعىندارى 1 مينۋتقا جۇمىستارىن توقتاتتى. ءبىرمينۋتتىق ۇنسىزدىكتەن كەيىن ەلدە 10 كۇندىك ازا تۇتۋ جاريا ەتىلدى. 10 كۇن بويى ۇكىمەتتىك عيماراتتار مەن اسكەري كەمەلەردەگى تۋ تومەن ءتۇسىرىلدى.
ناۋرىز ايىنان وسى ۋاقىتقا دەيىن يسپانيادا Covid-19-دان 28 مىڭنان استام ادام كوز جۇمدى. ال ىندەت جۇقتىرعاندار سانى 300 مىڭ ادامنان اسىپ تۇسەدى. وتكەن اپتادان باستاپ بۇل ەلدە كوروناۆيرۋس ىندەتىن جۇقتىرۋ جاعدايلارىنىڭ قايتا بەلەڭ الىپ بارا جاتقاندىعى بايقالادى.
16- شىلدە كۇنى يسپانيادا كوروناۆيرۋس پاندەمياسى سالدارىنان قازا تاپقانداردى ەسكە الۋعا ارنالعان مەملەكەتتىك شارا وتەدى.
28- ساۋىردە ۇلى بريتانيا Covid-19-دان قازا تاپقان مەديتسينا جانە الەۋمەتتىك قىزمەتكەرلەردى ءبىر مينۋتتىق ۇنسىزدىكپەن ەسكە الدى. قازىرگى ۋاقىتتا ەلدە ۆيرۋس جۇقتىرۋدىڭ 290 مىڭعا جۋىق جاعدايى ناقتىلانعان. قازا تاپقانداردىڭ سانى 44,8 مىڭ ادامنان اسىپ كەتتى.
جالپى، ۇلى بريتانيا ەۋروپاداعى ىندەتتەن ەڭ كوپ ادامىنان ايىرىلعان ەل سانالادى. شۆەتسيا پارلامەنتى 17 ماۋىمدا كوروناۆيرۋس ىندەتىنەن قازا تاپقان 5,5 مىڭ ازاماتىن ەسكە الۋعا ارنالعان 15 مينۋتتىق شارا وتكىزدى. شارا ءبىرمينۋتتىق ۇنسىزدىكپەن اياقتالدى.
بۇعان دەيىن 31- ناۋرىزدا فرانسيانىڭ ۇلتتىق اسسامبلەياسى كوروناۆيرۋس ىندەتىنەن قازا تاپقانداردى ەسكە العان ەدى.
قازاقستاندا 13- شىلدە - جالپىۇلتتىق ازا تۇتۋ كۇنىندە 1 مينۋتتىق ۇنسىزدىك ءوتتى. اقوردا رەزيدەنتسياسىنىڭ الدىندا مەملەكەت باسشىسى قاسىم-جومارت توقايەۆ كوروناۆيرۋس ىندەتىنەن قازا تاپقان ازاماتتاردى قۇرمەتپەن ءبىر مينۋت ەسكە الدى.
ەسكە الۋ راسىمىنە ق ر مەملەكەتتىك حاتشىسى قىرىمبەك كوشەربايەۆ، ق ر پرەزيدەنتى اكىمشىلىگىنىڭ باسشىسى ەرلان قوشانوۆ، قاۋىپسىزدىك كەڭەسىنىڭ حاتشىسى اسەت يسەكەشەۆ، پرەزيدەنت كەڭسەسىنىڭ باستىعى نۇرلان ونجانوۆ، دەنساۋلىق ساقتاۋ ءمينيسترى الەكسەي تسوي قاتىستى.
ىندەت قۇرباندارىن ءۇنسىز ەسكە الۋ ءراسىمى رەسپۋبليكانىڭ بارلىق ايماعىندا ءوتتى. قۇرباندارعا تاعزىم شاراسىن رەسپۋبليكالىق ارنالار تىكەلەي ەفير ارقىلى كورسەتتى.
بۇكىل ەلىمىزدە مەملەكەتتىك تۋ تومەن ءتۇسىرىلىپ، تەلەارنالار مەن راديولار ەفيردەن ويىن- ساۋىق باعدارلامالارىن الىپ تاستادى. 13- شىلدەدەگى دەرەكتەرگە سايكەس، قازاقستاندا كوروناۆيرۋستان 375 ادام قازا تاپتى.