اتىراۋدان نۇر-سۇلتانعا قاتىنايتىن پويىزدار ۋاقىتشا جۇرمەيدى

اتىراۋ. قازاقپارات - اتىراۋ قالاسىنان جولاۋشىلار پويىزىنىڭ جول ءجۇرۋى ۋاقىتشا توقتاتىلادى، دەپ حابارلايدى قازاقپارات «جولاۋشىلار تاسىمالى» ا ق باسپا ءسوز قىزمەتىنە سىلتەمە جاساپ.

مەملەكەتتىك كوميسسيانىڭ 2- شىلدەدەگى شەشىمىنە، باس مەملەكەتتىك سانيتار دارىگەردىڭ 3 شىلدەدەگى 44№ قاۋلىسىنا سايكەس جانە ق ر يندۋستريا جانە ينفراقۇرىلىمدىق دامۋ مينيسترلىگىنىڭ حاتى نەگىزىندە جاڭا شەشىم قابىلداندى.

«اتىراۋ - نۇر- سۇلتان نۇرلى جول» باعىتىنداعى 47/48№ جولاۋشىلار پويىزى 13- شىلدەدەن باستاپ - اتىراۋدان، 15- شىلدەدەن باستاپ - نۇرلى جولدان جول ءجۇرۋىن ۋاقىتشا توقتاتادى. اتالعان پويىزعا بۇرىن بيلەت العان جولاۋشىلار قۇجاتىن قايتارىپ، اقشالاي قاراجاتتى تولىق كولەمدە الا الادى. بيلەت اقشاسىن قايتارۋ قولما-قول جانە قولما-قول اقشاسىز ەسەپ ايىرىسۋ ارقىلى جۇرگىزىلەدى» دەلىنگەن حابارلامادا.

جولاۋشى پويىزدارىنىڭ قوزعالىس كەستەسى بويىنشا بارلىق اقپاراتتى «105» نومىرىنە حابارلاسىپ بىلۋگە بولادى. ۇلتتىق تاسىمالداۋشى جولاۋشىلاردان قابىلدانعان شارالارعا تۇسىنىستىكپەن قاراپ، كوروناۆيرۋس پاندەمياسىنىڭ تارالۋ كەزەڭىندە سانيتارلىق-ەپيدەميولوگيالىق تالاپتاردى ساقتاۋدى سۇرايدى.