ءجۇرسىن ەرمان: كۇن جامانى كەتەر - بۇل ناۋبەتتەن دە شىعارمىز

نۇر- سۇلتان. قازاقپارات - قازاقستاننىڭ ەڭبەك سىڭىرگەن قايراتكەرى ءجۇرسىن ەرمان قازىر حالىقتى ءبىر- بىرىنە سەپ بولۋعا، قامقورلىق جاساپ، ءتارتىپ ساقتاۋعا شاقىردى، دەپ حابارلايدى قازاقپارات ءتىلشىسى.

«الماتىنىڭ ىرگەسىندە جاڭالىق دەيتىن اۋىل بار. 1937-1938 -جىلدارداعى ساياسي قۋعىن- سۇرگىن قۇرباندارىنىڭ تالايى سول جەردە جەرلەنگەن. ساكەن سەيفۋللين، ءىلياس جانسۇگىروۆ، بەيىمبەت مايليندەر.. . كوپ قوي قۇربان بولعاندار. ءار جىلدىڭ مامىر ايىنىڭ سوڭعى كۇنى سول جەرگە بارىپ، قۇران وقىپ، ارداقتى الاشتىڭ ارىستارىن ەسكە الىپ، ازا تۇتۋشى ەدىك. ەندى قازىر ەل بولىپ، مەملەكەت، حالىق بولىپ ازا تۇتۋ كۇنىنىڭ ۇستىندە وتىرمىز. ءبىر ادامعا كوڭىل ايتۋعا بوي ۇيرەنگەن عوي. بۇكىل حالىققا كوڭىل ايتۋ اسا قورقىنىشتى ەكەن»، - دەيدى ءجۇرسىن ەرمان.

قازاقستاننىڭ ەڭبەك سىڭىرگەن قايراتكەرى قازاقتىڭ نەبىر اياۋلى دا اسىل ازاماتتارى كەتىپ جاتقانىن وكىنىشكە ەسكە الدى.

«ءار ادامنىڭ، ءار قازاقتىڭ ءومىرى قىمبات. مەملەكەتىمىز بار دەپ كوڭىلدى كەڭگە سالۋشى ەدىك. الايدا كەي قيىندىققا دايىن ەمەس ەكەن. اسىرەسە مەديتسينا سالاسىنان مۇنى كورىپ وتىرمىز. ءبىراق تىلەكتى جاقسىلىققا تىلەۋ كەرەك. بۇگىن بارلىق جەردە تۋ ءتۇسىرىلىپ، قۇران قاتىم وقىلىپ، قۇرباندىق شالىنىپ، ازا تۇتىپ، ءبىر- بىرىمىزگە كوڭىل ايتىپ جاتىرمىز. كۇن جامانى كەتەر دەۋشى ەدى عوي قازاق. بۇل ىندەتتىڭ قاشان كەتەتىنىن قايدان بىلەيىك. ماۋسىمدا جاعداي تۇراقتالعانداي بولىپ ەدى - قازىر مۇلدە ءورشىپ كەتتى. الەۋمەتتىك جەلىنى اشۋعا، تەلەفون شىرىلداسا دا قانداي حابار كەلىپ تۇر ەكەن دەپ قورقىپ وتىراتىن بولدىق. دەسە دە ۇرەيگە بوي الدىرماۋ كەرەك»، - دەيدى ول.

ءجۇرسىن ەرمان ءبىر- بىرىمىزگە سەپ بولىپ، قامقورلىق جاساپ، قاتاڭ شارالاردىڭ بارىنە مويىنسىنىپ، ءتارتىپ ساقتاۋىمىز كەرەكتىگىن جەتكىزدى.

«قايتىس بولعان ازاماتتاردىڭ تۋعان- تۋىستارىنا، جاقىندارىنا قايعىرىپ كوڭىل ايتامىز. سابىر بەرسىن. بۇل ناۋبەتتەن دە اللا جار بولسا شىعاتىن شىعارمىز. سوعان ۇمىتتەنەيىك، سوعان دۇعا جاسايىق. بارشامىزدى جاقسى كۇندەردە كورىسۋگە جازسىن، اللا تاعالا»، - دەدى ءجۇرسىن ەرمان.

ايتا كەتسەك، ەلىمىزدە قالىپتاسقان احۋالعا بايلانىستى حالىققا ۇندەۋ جاساعان قر پرەزيدەنتى قاسىم- جومارت توقايەۆ 13 - شىلدەنى - ۇلتتىق ازا تۇتۋ كۇنى دەپ جاريالايتىنى تۋرالى ءمالىم ەتكەن بولاتىن. ءتيىستى وكىمگە مەملەكەت باسشىسى كەلەسى كۇنى قول قويدى. قازاقستاندا كوروناۆيرۋس پاندەمياسىنىڭ قۇربانى بولعان ازاماتتاردى ەسكە الۋعا بايلانىستى بۇگىن – جالپى ۇلتتىق ازا تۇتۋ كۇنى.