كادىربەك سەگىزبايەۆ: ءدارى- دارمەكتى قىمباتقا ساتىپ، پايدا تاپقانداردى اياماي جازالاۋ كەرەك
«بۇل جالعىز قازاققا عانا ەمەس، بۇكىل الەم جۇرتشىلىعىنىڭ باسىنا تونگەن ۇلكەن قاسىرەت قوي. جالپى مەن ازامات بولعالى تەك اكەلەرىمىزدىڭ، بابالارىمىزدىڭ ۇلكەن دەرتتەرگە ۇشىراعانىن، وبا نەمەسە سۇزەكتى وتكەرگەندەرىن ءجيى ەستيتىنمىن. كەيىنگى كەزدە مەديتسينا عىلىمى ابدەن جەتىلدى عوي. مۇنداي سۇمدىقتار ەندى بولا قويماس دەپ ويلاۋشى ەدىك. اياق استىنان وسىنداي ناۋبەت بولدى. دەگەنمەن بۇل ناۋبەت - حالىقتىڭ باسىنا تۇسكەن ۇلكەن سىن دەپ ايتۋعا بولادى. بىلايشا ايتقاندا، «مىلتىقسىز مايدان». قازىر وڭىمىزدان كەلە مە، سولىمىزدان كەلە مە، اسپاننان شىعا ما، جەردەن كەلە مە - ادام بىلمەيدى. ايتەۋىر اۋرۋ جۇقتىرعان اعايىندار، جولداس- جورالار تىم كوبەيىپ كەتتى. شىعىن دا از ەمەس. مۇنىڭ ءبارى قالاي بولعاندا دا ۇلكەن قاسىرەت»، - دەدى كادىربەك سەگىزبايەۆ قازاقپارات تىلشىسىنە تەلەفون ارقىلى بىلدىرگەن پىكىرىندە.
جازۋشى مەملەكەت باسشىسى قاسىم- جومارت توقايەۆتىڭ بۇگىنگى كۇندى – جالپى ۇلتتىق ازا تۇتۋ كۇنى دەپ جاريالاۋ تۋرالى شەشىمىن قولدايتىنىن جەتكىزدى.
«بۇل وتە دۇرىس. قالاي بولعاندا دا ءولى رازى بولماي، ءتىرى بايىمايدى. ءبىزدىڭ كەشە عانا قاسىمىزدا جۇرگەن ازاماتتار، جولداس- جورالارىمىز و دۇنيەلىك بولىپ جاتىر. مۇنىڭ ءبارى مىلتىقسىز مايداننىڭ قۇرباندارى. مۇنى اناۋ جاساپتى، مىناۋ جاساپتى دەپ كىنالاۋعا بولماس. بۇل ۆيرۋس مۇمكىن تابيعي، بالكىم جاساندى شىعار. قالاي بولعاندا دا ءبىراز ازاماتتارىمىزدىڭ قايتىس بولىپ جاتقانى راس. مارقۇمداردىڭ جاتقان جەرى جايلى، توپىراعى تورقا بولسىن»، - دەگەن جازۋشى كوز جۇمعان ازاماتتاردىڭ ارتىندا قالعان بالا- شاعاسىنا، جولداس- جورالارىنا اماندىق تىلەدى.
كادىربەك سەگىزبايەۆ ءوز سوزىندە جۇرتشىلىقتى ساق بولۋعا شاقىردى.
«بۇل ناۋبەتتەن كۇن ىسىعاندا نەمەسە كۇن سۋىعاندا قۇتىلامىز دەگەن اڭگىمە شىقتى. مۇنىڭ ءبارى ءبىر اللانىڭ قولىندا شىعار. قالاي بولعاندا دا بۇدان قۇتىلارىمىز راس. قازىر بۇكىل الەم بولىپ ىندەتكە قارسى ارەكەتتەر جاسالىپ جاتىر. سول سەبەپتى ءۇمىتىمىز ەش ۋاقىتتا ازايمايدى. ءبىز ەل بولىپ، جۇرت بولىپ، بۇدان دا قۇتىلامىز»، - دەدى ول.
جازۋشى كوپشىلىكتىڭ ساقتىق شارالارىن ساقتاي بەرمەيتىنىن وكىنىشپەن ايتىپ ءوتتى.
«توي- تومالاق، قازا بولعانداردى جانازالاپ شىعارىپ سالۋ، توپتالىپ بارۋ دەگەندەر - اۋرۋدىڭ جۇعۋىنا بىردەن- ءبىر سەبەپ بولىپ وتىر. سوندىقتان حالقىمىزدى سابىرعا شاقىرعان دۇرىس شىعار. ءاربىرىمىز قازىر ءوز باسىمىزدى ويلامايىق. بۇل اۋرۋدىڭ كەسەلى قيىن كورىنەدى. ءار ادام ءوزىن ساقتاسا - اعايىندارىن دا ساقتايدى دەگەن ءسوز. جاقىنىنا جاناشىر بولۋ دەگەن وسىدان شىعادى دەپ ويلايمىن. سونداي- اق وسىنداي ناۋبەت كەزىندە، حالىقتىڭ باسىنا قاسىرەت ءتۇسىپ تۇرعان ۋاقىتتا كەيبىر پايداگوي ۇساق ادامداردىڭ ءدارى- دارمەكتى الىپ قىمباتقا ساتۋى، ساۋداگەرلىك جاساۋى - ءبىزدىڭ قازاق ءۇشىن جاراسپايتىن ۇلكەن ءمىن دەپ سانايمىن. ۇكىمەتتىڭ بۇل جاعدايدى قايتا- قايتا ەسكەرتىپ ايتىپ جاتۋى ورىندى شارۋا. «ايۋعا ناماز ۇيرەتكەن» تاياق دەيدى. مۇنداي وسپادارلاردى اياماي جازالاۋ كەرەك. ونسىز دا جەگىشتىك، جەمقورلىق اۋرەگە سالىپ تۇرعان كەزدە ناۋبەتكە ناۋبەت قوسۋعا بولمايدى. ەلىمىز امان، جۇرتىمىز تىنىش بولسىن، اعايىن»، - دەپ ءتۇيدى كادىربەك سەگىزبايەۆ.
ايتا كەتسەك ەلىمىزدە قالىپتاسقان احۋالعا بايلانىستى حالىققا ۇندەۋ جاساعان قر پرەزيدەنتى قاسىم- جومارت توقايەۆ 13 شىلدەنى - ۇلتتىق ازا تۇتۋ كۇنى دەپ جاريالايتىنى تۋرالى ءمالىم ەتكەن بولاتىن. ءتيىستى وكىمگە مەملەكەت باسشىسى كەلەسى كۇنى قول قويدى. قازاقستاندا كوروناۆيرۋس پاندەمياسىنىڭ قۇربانى بولعان ازاماتتاردى ەسكە الۋعا بايلانىستى بۇگىن - جالپىۇلتتىق ازا تۇتۋ كۇنى.