باس ءمۇفتي كاسىپكەرلەردى ءدارى- دارمەككە مۇقتاج وتانداستارىمىزعا قولداۋ كورسەتۋگە شاقىردى
«قادىرلى حالايىق! ءبىز تاعدىر مەن تاريحتىڭ ناۋبەتتى كەزەڭىنەن، الاساپىران زاماننىڭ سىنىنان ابىرويمەن وتكەن حالىقپىز. قۋانىشى مەن قايعىسى ارپالىسقان وتكىنشى ومىردە كەز كەلگەن پەندە سىنالماي تۇرمايدى. وسى كۇندەردە كۇللى الەم ءبىر تارىنىڭ قاۋىزىنا سىيعانداي كۇي كەشۋدە. ءبىز دە سىندارلى ساتتەرمەن بەتپە- بەت كەلدىك. قايعىلى حابارلار بارشامىزدىڭ قابىرعامىزدى قايىستىرىپ، ەلدىڭ ەڭسەسىن تۇسىرۋدە. وسى رەتتە جۇقپالى ىندەتتەن قايتىس بولعان ازاماتتاردىڭ جاقىن جۇراعاتتارى مەن اعايىن- تۋعاندارىنا ءوز اتىمنان تاعى دا كوڭىل ايتامىن. مارقۇمدارعا اللادان راقىم، پايعامباردان شاپاعات تىلەيمىن. الدى پەيىش، ارتى كەنىش بولعاي. قازالى ۇيگە جاراتقاننىڭ ءوزى جار بولسىن. ال ەمدەلىپ جاتقان وتانداستارىمىزعا اللا شيپاسىن بەرسىن. دەرتىنەن تولىقتاي ايىعىپ، تەز ساۋىعىپ كەتسىن» ، - دەدى باس ءمۇفتي.
ونىڭ ايتۋىنشا، بۇگىن مەشىت- مەدرەسەلەرىمىزدە مارقۇمدارعا ارناپ، ارنايى قۇران حاتىم دۇعاسى جاسالۋدا.
«قۇداي قابىل ەتكەي!. كوپتەگەن ازامات سىناق ساتىندە دەرتكە شالدىققاندارعا ءدارى- دارمەك پەن مۇقتاج جاندارعا كومەكتەسىپ، قولدارىنان كەلگەنشە كومەكتەرىن اياماۋدا. ولاردىڭ بارشاسىنا اللا رازى بولسىن. وسى رەتتە ەلىمىزدەگى بارشا كاسىپكەرلەر مەن داۋلەتتى جانداردى ەل يگىلىگى ءۇشىن دەرتكە شالدىققان جانە ءدارى- دارمەككە مۇقتاج بولىپ وتىرعان وتانداستارىمىزعا قولداۋ كورسەتۋگە شاقىرامىن. ەلدىڭ يگىلىگى مەن حالقىمىزدىڭ اماندىعى ءۇشىن بىرلىگىمىزدى كورسەتەتىن كەز كەلدى. ءاربىر جاقسىلىعىمىز وسى ءبىر ناۋبەتتى كەزەڭنەن امان- ەسەن وتۋگە سەبەپكەر بولعاي!. راببىمىز ازات ەلدى ازا تۇتقىزباي، ەل ەڭسەسى مەن تۋىمىزدى تومەن تۇسىرمەي، ىندەتتى ىرگەمىزگە جۋىتپاي، مەرەيىمىزدى ءارقاشان ۇستەم ەتكەي!. ەڭ باستىسى، ساعىمىز سىنباسىن. جاراتۋشى يەمىزدىڭ جاردەمىنەن بۇل سىناقتى دا جەڭەمىز، ينشاللا. جاڭا كۇننەن جاقسىلىق كۇتكەن مۇسىلمان بالاسى رۋحىن تۇسىرمەي، كەلەر كۇندى يگى نيەتپەن قارسى الادى. قاشان دا بولاشاقتان ءۇمىت كۇتەدى. دەنىمىز قۋاتتى، ءار كۇنىمىز شۋاقتى بولعاي، ءامين!» ، - دەيدى ناۋرىزباي قاجى تاعان ۇلى.
ەلوردا ۋاقىتىمەن ساعات 13:00 دە وسى كۇندەرى قاريلارىمىز وقىپ جاتقان قۇران حاتىمنىڭ دۇعاسى جاسالادى. ال باس ءمۇفتيدىڭ قاتىسۋىمەن رەسپۋبليكالىق «ازىرەت سۇلتان» مەشىتىندە جاسالاتىن قۇران حاتىم دۇعاسىنا قمدب- نىڭ Instagram جەلىسىندەگى رەسمي پاراقشاسى جانە YouTube كانالى ارقىلى ونلاين قوسىلۋعا مۇمكىندىك بار.
ايتا كەتسەك ەلىمىزدە قالىپتاسقان احۋالعا بايلانىستى حالىققا ۇندەۋ جاساعان ق ر پرەزيدەنتى قاسىم- جومارت توقايەۆ 13 شىلدەنى - ۇلتتىق ازا تۇتۋ كۇنى دەپ جاريالايتىنى تۋرالى ءمالىم ەتكەن بولاتىن. ءتيىستى وكىمگە مەملەكەت باسشىسى كەلەسى كۇنى قول قويدى. قازاقستاندا كوروناۆيرۋس پاندەمياسىنىڭ قۇربانى بولعان ازاماتتاردى ەسكە الۋعا بايلانىستى بۇگىن – جالپى ۇلتتىق ازا تۇتۋ كۇنى.