قازاقستاننىڭ جاس فۋتبولشىسى سەربيالىق كومانداعا اۋىستى

نۇر-سۇلتان. قازاقپارات - قازاقستان جاستار قۇراماسىنا شاقىرتۋ العان فۋتبولشى يزات قۇلجانوۆ سەربيانىڭ «رادنيچكي پيروت» كومانداسىنا اۋىستى، دەپ حابارلايدى قازاقپارات.

اقپاراتتى اگەنتتىك تىلشىسىنە فۋتبولشىنىڭ ءوزى ايتتى. يزات قازىر سەربيادا. ول بۇعان دەيىن «ەرتىس» فۋتبول كلۋبىندا ويناعان.

ەسكە سالساق، بۇعان دەيىن ءبىز پاۆلوداردىڭ «Ertis» كلۋبى فۋتبولدان قازاقستان چەمپيوناتىنا قاتىسۋدان باس تارتقانى جانە كلۋبتا قارجىلاي قيىنشىلىقتار بار ەكەنى تۋرالى حابارلاعان بولاتىنبىز. 18 جاستاعى يزات قۇلجانوۆ - اقسۋ فۋتبول مەكتەبىنىڭ تۇلەگى. 2009-جىلى بەلگىلى سپورت باپكەرى ماناربەك قاسەنوۆتىڭ قول استىندا جاتتىعۋ جاسادى. كەيىن «ەرتىستىڭ» جاستار كومانداسىنا الىندى. بىرنەشە رەت قازاقستان جاستار قۇراماسىنا شاقىرتىلعان. 2019-جىلى پاۆلودار كلۋبى ساپىندا 32 ماتچقا قاتىسىپ، 8 گول سوقتى. يزات جارتىلاي قورعاۋشى شەبىندە دوپ تەبەدى. يزات قۇلجانوۆتىڭ جاڭا كومانداسى «رادنيچكي پيروت» سەربيانىڭ ءبىرىنشى ليگاسىندا وينايدى. ۇجىم بىلتىر ليگانى 13-ورىندا اياقتاعان.