قىتايداعى سۋ تاسقىنى: وزەندەر دەڭگەيى قاۋىپتى مەجەدەن اسىپ ءتۇستى

بەيجىڭ. قازاقپارات - جەكسەنبى كۇنى قىتايدا توقتاۋى بولماي وتىرعان سۋ تاسقىنىنا بايلانىستى توتەنشە جاعدايلارعا ارەكەت ەتۋ دەڭگەيى ۇشىنشىدەن ەكىنشى دەڭگەيگە كوتەرىلدى.

«قازاقپارات» ح ا ا مەنشىكتى ءتىلشىسى بۇل تۋرالى ق ح ر سۋ رەسۋرستارى مينيسترلىگىنە سىلتەمە جاساپ حابارلايدى.

ءمالىم ەتىلگەندەي، بۇل شارانىڭ ەنگىزىلۋ سەبەبى - ماۋسىم ايى باستالعالى قىتايدىڭ ورتالىق، شىعىس جانە وڭتۇستىگىندەگى كوپتەگەن اۋدانداردا نوسەر جاۋىن تولاستاماي وتىر.

زارداپ شەككەن وڭىرلەردە وزەندەر دەڭگەيى قاۋىپتى مەجەدەن اسىپ تۇسكەن. ال 19 سۋ ارتەرياسىندا تاريحي ماكسيمۋمدار تىركەلدى.

«ال تسزيانسي (شىعىس قىتاي) پروۆينتسياسىنىڭ بيلىگى توتەنشە جاعدايعا ارەكەت ەتۋ دەڭگەيىن ەكىنشىدەن بىرىنشىگە (ەڭ جوعارى) كوتەردى. مۇندا 5 ميلليونعا جۋىق ادام سۋ تاسقىنى اۋماعىندا قالىپ وتىر. تابيعاتتىڭ توسىن مىنەزىنەن 500 مىڭ گەكتارعا جۋىق ەگىستىك القابىنا زاقىم كەلدى. جەرگىلىكتى بيلىككە بوگەتتەرگە، سۋ قويمالارى مەن گيدروەلەكترستانتسيالارىنا باقىلاۋدى كۇشەيتۋ جۇكتەلدى»، - دەلىنگەن اقپاراتتا.

ەسكە سالايىق، قىتايدا توتەنشە وقيعالارعا ارەكەت ەتۋدىڭ ءتورت دەڭگەيلى جۇيەسى قاراستىرىلعان.