قاتاڭ كارانتين: تالاپتىڭ ساقتالۋىنا رەيد وتۋدە
وڭىرلىك كوممۋنيكاتسيالار قىزمەتىنىڭ مالىمەتىنشە، موبيلدى توپ مۇشەلەرى جۇرگىزگەن رەيدتىك شارالار كەزىندە كارانتين تالابىن بۇزعان بىرنەشە دەرەك تىركەلگەن.
«رەيد كەزىندە 40 تان اسا ازىق-تۇلىك دۇكەنى، ءدامحانا مەن مەيرامحانالار تەكسەرىلىپ، ولاردىڭ اراسىندا شەكتەلگەن ۋاقىتتان تىس جۇمىس ىستەۋ فاكتىلەرى انىقتالدى. سونىمەن قاتار، 11- شىلدەدە اققىستاۋ اۋىلدىق وكرۋگىندە جۇرگىزىلگەن تەكسەرىس كەزىندە وتباسىلىق جيىن-توي وتكىزىپ جاتقان ءبىر وتباسى انىقتالدى. اتالعان دەرەكتەر قاتىستى ءتيىستى شارالار قابىلداۋ ءۇشىن ماتەريالدار اتىراۋ قالالىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنا جولداندى»، - دەلىنگەن اقپاراتتا.
سونداي-اق اتىراۋ قالالىق پوليتسيا باسقارماسى پاترۋلدىك پوليتسيا باسقارماسىنىڭ ۆزۆود كومانديرى جاسۇلان كامارەدەنوۆتىڭ ايتۋىنشا، تۇنگى ساعات 23:00 دەن كەيىن جۇرگەن 6 كولىك يەسىنە ەسكەرتۋ بەرىلدى.
جۇمىسكەر اۋىلىندا كولىك جوندەۋ ورتالىعىنىڭ جۇمىس ىستەپ تۇرعانى انىقتالسا، تۇنگى ساعات 00:30 شاماسىندا ۆوكزال ماڭى ىقشاماۋدانىندا ازىق-تۇلىك دۇكەنى ساۋدا-ساتتىق جاساعان. رەيد كەزىندە وبلىس تۇرعىندارىنا وتباسىلىق جيىن-توي وتكىزبەۋ جونىندە ءتۇسىندىرۋ جۇمىستارى جۇرگىزىلگەن. ال، كاسىپكەرلەرگە اتىراۋ وبلىسىنىڭ باس سانيتارلىق دارىگەرىنىڭ قاۋلىسىمەن ەنگىزىلگەن تالاپتاردى تولىق ساقتاۋ قاجەتتىگى ەسكەرتىلدى.
ەسكە سالايىق، 11- شىلدە ساعات 00.00 دەن باستاپ اتىراۋ وبلىسىندا كارانتين كۇشەيتىلگەن بولاتىن. قازىر اتىراۋ ءوڭىرى كوروناۆيرۋسقا شالدىققان ناۋقاستار سانى بويىنشا ەلىمىزدە الدىڭعى ورىندا تۇر.