+7 (701) 759 90 19
16 °С : نۇر-سۇلتان
23 °С : الماتى
USD 412.55 EUR 468.66
RUB 5.79 CNY 58.80
جاڭالىقتار

جىلقى ەتى مەن قىمىزدان اسقان دارۋمەن جوق - تورەگەلدى شارمانوۆ

12 شىلدە 11:30
:ءبولىسۋ
جىلقى ەتى مەن قىمىزدان اسقان دارۋمەن جوق - تورەگەلدى شارمانوۆ

نۇر-سۇلتان. قازاقپارات - مەديتسينا عىلىمدارىنىڭ دوكتورى، اكادەميك تورەگەلدى شارمانوۆ كوروناۆيرۋس ينفەكسياسىنىڭ الدىن الۋ، ءۇي جاعدايىندا ەمدەلۋ شارالارى، بويعا قۋات بەرەتىن اس ءمازىرى تۋرالى كەڭەس بەردى.

بۇل تۋرالى قازاقپارات Ortalyq Qazaqstan گازەتىنە سىلتەمە جاساپ حابارلايدى.

«بۇل ىندەت توسىننان پايدا بولدى دەپ ايتۋدىڭ ءوزى اۋىر. ەگەر، ءدال سولاي دەسەك، اقيقاتتان اۋىتقىپ كەتۋىمىز ىقتيمال. ءدىن سالاسىنداعىلار مۇنى اللانىڭ نازاسىنا بالاپ ءجۇر. قيسىنى بار. ادامزات بالاسىنىڭ اللادان ايلا اسىرامىن دەگەن استامشىلىعىنا جاراتۋشىمىزدىڭ نازالانۋى ابدەن مۇمكىن. عالىمدار ىندەتتىڭ تارالۋ جىلدامدىعىن تابيعي تەپە- تەڭدىكتىڭ بۇزىلۋىنان ىزدەپ جاتىر. ساياسي ويىننان شىققان وت دەپ جۇرگەندەر دە بار. ايتەۋىر، اسا ءقاۋىپتى ىندەت ەكەنىن كوزىمىز كورىپ وتىر. ساق تانۋ كەرەك. ءار ادامنىڭ جاۋاپكەرشىلىگى، ءبىر- بىرىمىزگە دەگەن جاناشىرلىق كەرەك»، - دەيدى قازاق تاعامتانۋ اكادەمياسىنىڭ پرەزيدەنتى تورەگەلدى شارمانوۆ.

قانشاما جىلدان بەرى سالاۋاتتى ءومىر سالتىن ۇستانىپ كەلگەن اكادەميك تاماقتانۋ راتسيونىن وزگەرتپەگەنىن ايتتى.

«كەيبىر جاعدايدا بويعا قۋات بەرەتىن، اعزا يممۋنيتەتىن كوتەرەتىن تاعامدار كولەمىن ۇلعايتتىم. جىلقى ەتىن جەيمىن. قىمىز ىشەمىن. جاياۋ ءجۇرىپ، جاتتىعۋ جاسايمىن. ادام اۋەلى وزىنە جانى اشۋى كەرەك. وزىنە جانى اشىعان ادام، ءوزىن جامان ىندەتتەن ساقتاندىرا بىلگەن ادام - ۇلتقا جانى اشىعان ادام. وسىنى ەستەن شىعارماعان ابزال»، دەدى تورەگەلدى شارمانوۆ.

ونىڭ ايتۋىنشا، ىندەتپەن كۇرەسۋدىڭ ناتيجەلى بولۋى ءۇشىن ەڭ اۋەلى ادامعا سابىر، ءتوزىم كەرەك. «ءدال وسى كەسەلدىڭ پسيحولوگيالىق سالدارى - وتە اۋىر. ءبىز - نەبىر جاۋگەرشىلىك زاماندى، اشارشىلىق ناۋبەتىن، سوعىس جىلدارىنداعى اۋىر تۇرمىس دەيسىز بە، نەبىر اۋىرتپالىق كورگەن جانە جەڭگەن رۋحى بەرىك حالىقپىز. مۇنى دا جەڭەمىز! ءقازىر بىزدە مۇمكىندىك كوپ. تەحنولوگيا دامىعان، ءبىلىمدى، بىلىكتى ماماندار بار. زامان وزگەرگەن. سول ءۇشىن ەرتەڭگە دەگەن سەنىمنەن اداسپاۋ كەرەك. كۇنى ەرتەڭ تۋاتىن مامىراجاي تىرلىكتەن كۇدەر، ءۇمىت ۇزبەۋىمىز كەرەك. بۇل ىندەتتىڭ ەڭ باستى ەمى - سابىر»، دەدى تورەگەلدى شارمانوۆ.

اكادەميك «يممۋنيتەتتى كوتەرۋ، اۋرۋعا اعزانىڭ قارسى تۇرۋ قابىلەتىن ارتتىرۋ دەگەن ماسەلەدە مەن قازاقتىڭ ۇلتتىق تاعامدارىن عانا ايتامىن» دەدى.

«ارينە، اس مازىرىڭىزدە بالىق، جەمىس-جيدەك سەكىلدى دارۋمەنگە باي تاعامدار بولۋى قاجەت. ءبىراق جىلقى ەتى مەن قىمىزدان اسقان دارۋمەن جوق. قۇرت قوسىلعان سورپانىڭ ماڭىزى ەرەكشە. ەندى بۇل جەردە مىناداي ءبىر ماسەلە بار. مامان رەتىندە ءبىر تاعامنىڭ قۇنارى، پايداسى تۋرالى ايتساڭ، ەرتەڭ-اق ول تاعامنىڭ باعاسى شارىقتاپ شىعا كەلەدى. مىسالى، مەن جىلقى ەتىن ايتىپ وتىرمىن. وسى ىندەتتى جەڭەمىن دەگەن ادامنىڭ بارىندە ءدال قازىر جىلقى سويىپ الۋعا نەمەسە جىلقى ەتىن ساتىپ الۋعا جاعدايى كەلمەۋى مۇمكىن. دامەلەنۋ بار دا، ونى تۇتىنۋعا دارمەننىڭ جوقتىعى بار. باعالى نارسەگە قولى جەتپەگەن ادامنىڭ جۇيكەسىنە سالماق تۇسەدى. ال، جۇيكەنىڭ مازاسىزدانۋى دەرتتىڭ ۋشىعۋىنا جول اشىپ بەرەدى. سوندىقتان، جىلقى ەتىن ساتىپ الامىن دەپ تىراشتانۋدىڭ دا، ساتىپ الا الماساڭ، مازاسىزدانۋدىڭ دا قاجەتى جوق. نەگىزىنەن، ەت تاعامدارىن كوبىرەك تۇتىنۋ كەرەك. قانشا اۋىر بولعانىمەن، قوي ەتىنىڭ دە ەمدىك قاسيەتى زور»، - دەيدى ول.


:ءبولىسۋ
پئكئر قالدئرؤ
+7
جئبةرؤ
سونداي-اق... وقىڭىز
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات