قىركۇيەكتە بالالار ونلاين وقي ما، الدە مەكتەپكە بارا ما - ايماعامبەتوۆتىڭ جاۋابى

نۇر- سۇلتان. قازاقپارات - وسى جىلدىڭ قىركۇيەگىندە بالالار ونلاين وقي ما، الدە مەكتەپكە بارا ما؟ بۇل سۇراققا ءبىلىم جانە عىلىم ءمينيسترى اسحات ايماعامبەتوۆ جاۋاپ بەردى، دەپ حابارلايدى قازاقپارات ءتىلشىسى.

«بىرىنشىدەن جالپى دايىندىق جوعارى دەڭگەيدە جۇرگىزىلىپ جاتىر. اياقتالعان وقۋ جىلىنىڭ ءتورتىنشى توقسانىندا دا دايىندىق جۇمىستارى توقتاپ قالعان ەمەس. بۇل تۋرالى بۇرىن دا ايتقانبىز. ەكىنشىدەن، بۇل تۇرعىدا ءبىلىم جانە عىلىم مينيسترلىگىنىڭ جالپى جوسپارى بار. كۇردەلى ەپيدەميولوگيالىق جاعدايدى ەسكەرە وتىرىپ، ءبىز ءاۋ باستان ءۇش نەگىزگى نۇسقاعا دايىندالدىق. بولجامىمىز دۇرىس بولىپ شىقتى»، - دەدى اسحات ايماعامبەتوۆ ءبىلىم جانە عىلىم مينيسترلىگىنىڭ ونلاين فورماتتاعى تىلشىلەرمەن كەزدەسۋىندە.

ءمينيستردىڭ ايتۋىنشا وسى ءۇش باعىت بويىنشا دايىندىق جۇمىستارى قىزۋ جۇرگىزىلۋدە. «وسى ءۇش نۇسقا دەنساۋلىق ساقتاۋ مينيسترلىگىمەن، باسقا دا مەملەكەتتىك ورگاندارمەن تالقىلانۋ ۇستىندە. ونىڭ قىر- سىرىن زەرتتەۋ بويىنشا جۇمىس توپتارى بار. ىسكە عالىمدار مەن پەداگوگتاردى، مەكتەپ ديرەكتورلارى مەن ساراپشىلاردى تارتتىق. سول سەبەپتى قازىرگى ۋاقىتتا بارلى وڭىردە ۇلكەن تالقىلاۋ جۇمىستارى جۇرگىزىلۋدە. وسىعان دەيىن الەۋمەتتىك جەلىدە تاراپ كەتكەن سلايد- ماتەريال ءبىلىم جانە عىلىم مينيسترلىگىنە تيەسىلى ەمەس. ونى مەكتەپ دەڭگەيىندە تالقىلاعانداردىڭ ءبىرى تاراتۋى مۇمكىن»، - دەدى ول.

اسحات ايماعامبەتوۆ سونىمەن بىرگە مۇعالىمدەرگە ارنالعان كۋرستار دايىندالعانىن جەتكىزدى.

«ەڭ ماڭىزدى سۇراقتاردىڭ ءبىرى - پەداگوگتەردىڭ قازىرگى جاڭا جاعدايعا دايىندىعى. قانداي نۇسقا قابىلدانسا دا پەداگوگتەرگە جاڭا داعدى كەرەك. ونى ءتورتىنشى توقساندا ايقىن بايقادىق. سوندىقتان بەس مودۋلدەن تۇراتىن وسى كۋرستار - ІТ - داعدى، سيفرلىق پەداگوگيكا ماسەلەلەرىن قامتيدى. قانداي نۇسقا قابىلدانسا دا - وسى كۋرستاردى جۇرگىزەمىز. سونداي- اق كومپيۋتەر مەن سەرۆەرلەر، ينتەرنەت ماسەلەسى. قاشىقتان وقىساق تا، قالىپتى وقىساق تا - مەكتەپتەرگە كومپيۋتەر كەرەك. اكىمدىكتەر وسى ماسەلەگە ءجىتى نازار اۋدارىپ وتىر. ەگەر مەكتەپتە ءبىر كومپيۋتەرگە 20-25 بالادان كەلسە، وندا ولاردىڭ ІТ - داعدىسىن دامىتامىز دەگەن ءسوز بەكەر»، - دەدى ول.

مينيستر ءوز سوزىندە ەرەكشە قاجەتتىلىگى بار بالالارعا بەرىلەتىن ءبىلىم ساپاسى ماسەلەسى دە ۇمىتىلمايتىنىن جەتكىزدى.

ەسكە سالا كەتسەك پرەزيدەنت قاسىم- جومارت توقايەۆ ۇكىمەتتىڭ كەڭەيتىلگەن وتىرىسىندا مەكتەپتەردىڭ الداعى جاڭا وقۋ جىلىنا دايىندىعىن پىسىقتاعان بولاتىن.

«بۇل - اكىمدىكتەر مەن مينيسترلىكتىڭ جۇمىسىنىڭ ناتيجەسى. اكىمدىكتەر جاڭا وقۋ جىلىنا دەرەۋ دايىندالىپ، مەكتەپتەر مەن جەكەلەگەن مۇقتاج وتباسىلاردى قاجەتتى تەحنيكامەن جابدىقتاۋعا ءتيىس. 1- قىركۇيەكتە جاڭا وقۋ جىلى باستالادى. مينيسترلىكتىڭ بۇل وقيعاعا دايىندىعىنا كۇمانىم بار. بالالار قالاي وقيدى - مەكتەپتە نەمەسە قاشىقتا؟ مۇعالىمدەردىڭ جاڭا وقۋ جىلىنا دايىندىعى قانداي؟»، - دەپ سۇراق قويدى مەملەكەت باسشىسى.

اۆتور: ايان بەكەن ۇلى