اسحات ايماعامبەتوۆ پاندەميا كەزىندەگى قابىلدانعان شەشىمدەرگە وكىنبەيتىنىن مالىمدەدى

None
None
نۇر- سۇلتان. قازاقپارات - ءبىلىم جانە عىلىم ءمينيسترى اسحات ايماعامبەتوۆ پاندەميا كەزىندەگى قابىلدانعان شەشىمدەرگە وكىنبەيتىنىن مالىمدەدى، دەپ حابارلايدى قازاقپارات ءتىلشىسى.

«ءاۋ باستا باسىم كوپشىلىگى «ءتورتىنشى توقساندى شىلدە- تامىز ايلارىنا اۋىستىرايىق» دەسە، كەيبىرى «ودان دا وسىمەن وقۋ جىلىن اياقتايىق» دەگەن ەدى. الايدا وسىنداي پىكىرلەرگە قاراماستان ءبىز وقۋدى قاشىقتان جالعاستىرۋ تۋرالى شەشىم قابىلدادىق»، - دەدى اسحات ايماعامبەتوۆ ءبىلىم جانە عىلىم مينيسترلىگىنىڭ ونلاين فورماتتاعى تىلشىلەرمەن كەزدەسۋىندە.

ءبىلىم جانە عىلىم ءمينيسترى بۇل شەشىمنىڭ وڭ بولعانىن جەتكىزدى. «بۇل شەشىمگە تيتتەي دە وكىنبەيمىن. تولىعىمەن دۇرىس دەپ ەسەپتەيمىن. سول كەزدەگى ۇسىنىستارعا قۇلاق اسقاندا قازىرگى شىلدە ايىندا جاعدايىمىز قالاي بولار ەدى - ەلەستەتە بەرىڭىز»، - دەدى اسحات ايماعامبەتوۆ.

ەسكە سالا كەتسەك پرەزيدەنت قاسىم- جومارت توقايەۆ ۇكىمەتتىڭ كەڭەيتىلگەن وتىرىسىندا مەكتەپتەردىڭ الداعى جاڭا وقۋ جىلىنا دايىندىعىن پىسىقتاعان بولاتىن.

«بۇل - اكىمدىكتەر مەن مينيسترلىكتىڭ جۇمىسىنىڭ ناتيجەسى. اكىمدىكتەر جاڭا وقۋ جىلىنا دەرەۋ دايىندالىپ، مەكتەپتەر مەن جەكەلەگەن مۇقتاج وتباسىلاردى قاجەتتى تەحنيكامەن جابدىقتاۋعا ءتيىس. 1 - قىركۇيەكتە جاڭا وقۋ جىلى باستالادى. مينيسترلىكتىڭ بۇل وقيعاعا دايىندىعىنا كۇمانىم بار. بالالار قالاي وقيدى - مەكتەپتە نەمەسە قاشىقتان؟ مۇعالىمدەردىڭ جاڭا وقۋ جىلىنا دايىندىعى قانداي؟»، - دەپ سۇراق قويدى مەملەكەت باسشىسى.

اۆتور: ايان بەكەن ۇلى

سوڭعى جاڭالىقتار