قاسىم-جومارت توقايەۆ حالىقتى جۇمىسپەن قامتۋ بويىنشا ۇكىمەت جۇمىسىن سىنادى

None
None
نۇر-سۇلتان. قازاقپارات - ۇكىمەت اكىمدەرمەن بىرلەسىپ، شۇعىل تۇردە تۇراقتى جۇمىس ورىندارىن كوبەيتۋگە كىرىسۋى كەرەك.

بۇل تۋرالى ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى اقوردا باسپا ءسوز قىزمەتىنىڭ Twitter- دەگى پاراقشاسىنا سىلتەمە جاساپ.

«ءبىز «جۇمىسپەن قامتۋ جول كارتاسىن» قابىلدادىق. ونى جۇزەگە اسىرۋ ءۇشىن 1 تريلليون تەڭگە قارجى بولدىك. ءبىراق جوسپاردا كورسەتىلگەندەي 255 مىڭ ەمەس، 150 مىڭعا جۋىق ادام عانا جۇمىسقا ورنالاستى. جوبالاردىڭ دەنى، نەگىزىنەن، جوندەۋ جۇمىستارىنا باعىتتالعان»، - دەپ اتاپ ءوتتى قاسىم-جومارت توقايەۆ. مەملەكەت باسشىسىنىڭ ايتۋىنشا، جوبالاردىڭ 6 پايىزىندا عانا تۇراقتى جۇمىس ورنى قاراستىرىلعان.

«ونىڭ وزىندە مەملەكەتتىك سەكتورلاردا، ياعني مەكتەپتەر مەن اۋرۋحانالاردا. مۇنداي جۇمىس مەنى قاتتى الاڭداتادى. ۇكىمەت اكىمدەرمەن بىرلەسىپ، شۇعىل تۇردە تۇراقتى جۇمىس ورىندارىن كوبەيتۋگە كىرىسۋى كەرەك»، - دەدى پرەزيدەنت.

ايتا كەتەيىك، ۆيدەوبايلانىس ارقىلى ءوتىپ جاتقان جيىندا ۇكىمەت 2020 -جىلدىڭ العاشقى جارتى جىلدىعىنداعى ەلىمىزدىڭ الەۋمەتتىك- ەكونوميكالىق دامۋ قورىتىندىسى تۋرالى ەسەپ بەردى. سونداي-اق كوروناۆيرۋسقا قارسى كۇرەسكە قاتىستى قابىلدانعان شارالار، مەملەكەت باسشىسىنىڭ ۇكىمەتتىڭ الداعى ۋاقىتتا اتقاراتىن جۇمىسىنىڭ نەگىزگى باعىتتارى بويىنشا بەرگەن تاپسىرمالارى مەن مىندەتتەرى قاراستىرىلدى.

ەلىمىزدىڭ الەۋمەتتىك- ەكونوميكالىق دامۋىنىڭ قورىتىندىلارى مەن جىل سوڭىنا دەيىن ورىندايتىن مىندەتتەر جونىندە پرەمەر-مينيستر اسقار مامين، اقشا-نەسيە ساياساتىنا قاتىستى شارالار تۋرالى ۇلتتىق بانكتىڭ ءتوراعاسى ەربولات دوسايەۆ، ەلىمىزدەگى ەپيدەميولوگيالىق احۋالدى جاقسارتۋ جونىندەگى شارالار تۋرالى دەنساۋلىق ساقتاۋ ءمينيسترى الەكسەي سوي بايانداما جاسادى.

سوڭعى جاڭالىقتار