كوروناۆيرۋستان ايىققان ناۋقاس: جاس ءارى تالانتتى دارىگەرلەر مەنى قۇتقارىپ قالدى

None
None
نۇر-سۇلتان. قازاقپارات - كوروناۆيرۋس ينفەكسياسى دياگنوزى قويىلعان عۇمىربەك مانينوۆ 25 -ماۋسىم كۇنى اۋىر جاعدايدا اۋرۋحاناعا تۇسكەن.

ونىڭ ايتۋىنشا، اجالىمەن بەتپە-بەت كەزدەسۋىنە ءبىر-اق قادام قالعان. دارىگەرلەردىڭ ۋاقىتىلى كورسەتكەن كومەگى ارقاسىندا ول دەرتىنەن ايىققان. ول اجالىنا اراشا بولعان نۇر-سۇلتان قالاسىنداعى «ۇلتتىق عىلىمي مەديتسينالىق ورتالىق» ا ق دارىگەرلەرىنە العىس ايتتى، دەپ حابارلايدى قازاقپارات ءتىلشىسى.

«مەنى ءولىم اۋزىنان ءبىر-اق كۇن الىستاتىپ تۇرعان ەكەن. بۇل تۋرالى نۇر-سۇلتان قالاسىنداعى ۇلتتىق عىلىمي مەديتسينالىق ورتالىقتاعى حيرۋرگيا ءبولىمىنىڭ ءۇشىنشى پالاتاسىندا، ۇيگە شىعاتىن ۋاقىتتا ءبىلدىم. ۋاقىتىلى مەديتسينالىق كومەك الماعان جاعدايدا وسى جازعانىمدى ەمەس، مەن تۋرالى قارالى حاباردى وقيتىن ەدىڭىزدەر. مەن - عۇمىربەك مامينوۆ 2020 -جىلى 25-ماۋسىمدا كوروناۆيرۋس ينفەكسياسى دياگنوزىمەن اۋىر جاعدايدا اۋرۋحاناعا ءتۇستىم. جاس ءارى تالانتتى، ۇلكەن ارىپپەن جازىلاتىن جانە ۇلكەن جۇرەكتى كاسىبي مامان، كەۋدە بولىگى حيرۋرگياسى دارىگەرلەرى - جاقسىلىق جيەشيەۆ، الماز امانعاليەۆ، گينەكولوگيا ءبولىمىنىڭ اعا ورديناتورى اسەل يسەنوۆا جانە حيرۋرگيا ءبولىمىنىڭ مەڭگەرۋشىسى ءانۋار ابدىكارىموۆ مەنىڭ ءومىرىمدى قۇتقارىپ قالدى»، - دەيدى عۇمىربەك مانينوۆ.

ول ءوز ىسىنە ادال دارىگەرلەردىڭ ەڭبەگى وراسان زور ەكەنىن ايتتى.

«ولار گيپپوكرات انتى مەن ءوز ىسىنە ادال، ەرەكشە جاندار جانە بەيبىت ءومىردىڭ باتىرلارى. ۇلى اۆيتسەنا ءدال وسىنداي دارىگەرلەر تۋرالى «دارىگەردە قىراننىڭ قىراعىلىعى، ارۋدىڭ قولىنداي نازىك قولى، جىلاننىڭ دانالىعى، ارىستاننىڭ جۇرەگى بولۋى كەرەك» دەپ ايتقان. جاقسىلىق جيەشيەۆ، الماز امانگەلديەۆ، اسەل يسەنوۆا، ءانۋار ابدىكارىموۆكە كاسىبيلىگى، شىدامدىلىق جانە قامقورلىعى، ادامدارعا دەگەن قۇرمەتى جانە ومىرگە دەگەن سەنىمى ءۇشىن شىن جۇرەكتەن العىس ايتامىن. مەنى اجالدان اراشالاپ، ەل قاتارىنا قوسقاندارىڭىز ءۇشىن راحمەت! نۇر-سۇلتان قالاسىنداعى ۇلتتىق عىلىمي مەديتسينالىق ورتالىقتىڭ حيرۋرگيا بولىمىندەگى مەديتسينا قىزمەتكەرلەرىنىڭ بارىنە زور العىس ايتامىن»، - دەيدى ول.

ونىڭ ايتۋىنشا، وسى قيىن-قىستاۋ كەزدە دارىگەرلەر الدىڭعى قاتاردا اجالمەن ارپالىسىپ، دارىگەردىك مىندەتىن كاسىبي تۇردە ورىنداپ، ناۋقاستاردىڭ ءومىرىن قۇتقارۋدا.

«مەديتسينا قىزمەتكەرلەرىنە باسىمدى ءيىپ، العىس ايتام. وسىنداي قيىن كەزەڭدە سىزدەر سوعىستىڭ الدىڭعى شەبىندە جۇرگەندەي كۇرەسىپ، وتباسىمىزدى، بالالارىمىز، جالپى ۇلتتى ساقتاپ قالۋعا بار كۇشتەرىڭىزدى سالۋداسىزدار! ءوز مىندەتىن ءمىنسىز ورىنداپ، تاۋلىك بويى كوروناۆيرۋس ينفەكتسياسىمەن كۇرەسىپ، كۇن سايىن ادام جانىن قۇتقارىپ جاتقان دارىگەرلەر قاۋىمىنا ايتار العىسىم شەكسىز. ءبارىڭىزدىڭ دەندەرىڭىز ساۋ بولىپ، امان بولىڭىزدار! وزدەرىڭىزگە جاناشىر بولىڭىزدار. ءبىز ولمەيمىز، ءومىر سۇرەمىز، - دەيدى كوروناۆيرۋس ينفەكسياسىنان ايىققان ناۋقاس.

اۆتور: زارينا قاھارمان

سوڭعى جاڭالىقتار