جىل باسىنان بەرى ۇلتتىق ەكونوميكا كۇردەلى جاعدايدا دامىپ كەلەدى - پرەزيدەنت

None
None
نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا قانداي ماسەلەلەر قارالاتىنىن ايتتى، دەپ حابارلايدى قازاقپارات.

«بۇگىن ءبىز كوروناۆيرۋس ىندەتىنە قارسى قابىلدانىپ جاتقان شارالارعا قاتىستى ماسەلەلەردى قارايمىز. سونىمەن قاتار، بيىلعى ءبىرىنشى جارتىجىلدىقتاعى ەلىمىزدىڭ الەۋمەتتىك- ەكونوميكالىق دامۋىن قورىتىندىلايمىز. جىل باسىنان بەرى ۇلتتىق ەكونوميكا كۇردەلى جاعدايدا دامىپ كەلەدى. ەل ەكونوميكاسى جالپى 1,8 پايىزعا تومەندەدى. پاندەمياعا بايلانىستى قىزمەت كورسەتۋ سالاسى ايتارلىقتاي قۇلدىرادى (5,6 پايىز). حالىقتى جانە بيزنەستى قولداۋ ءۇشىن اسا ماڭىزدى شارالار قابىلدادىق. مەنىڭ تاپسىرمام بويىنشا ەكونوميكالىق ءوسىمدى قايتا قالپىنا كەلتىرۋ جونىندە كەشەندى جوسپار قابىلداندى. بۇگىن ۇكىمەت پەن اكىمدەردىڭ ەكونوميكالىق ءوسىمدى قالپىنا كەلتىرۋ جانە حالىقتىڭ ءال- اۋقاتىن قامتاماسىز ەتۋ جونىندە قابىلداعان شارالارىن تالقىلايمىز»، - دەدى ق ر پرەزيدەنتى ق. توقايەۆ.

پرەزيدەنت ۇكىمەتتىڭ كەڭەيتىلگەن وتىرىسىن كەلەسى تارتىپپەن جۇرگىزۋدى ۇسىندى:

ەلىمىزدىڭ الەۋمەتتىك- ەكونوميكالىق دامۋىنىڭ قورىتىندىلارى مەن جىل سوڭىنا دەيىن ورىندايتىن مىندەتتەر جونىندە پرەمەر-مينيستر اسقار ۇزاقباي ۇلى مامين بايانداما جاسايدى.

اقشا-نەسيە ساياساتىنا قاتىستى شارالار تۋرالى ۇلتتىق بانكتىڭ ءتوراعاسى ەربولات اسقاربەك ۇلى دوسايەۆ باياندايدى. ەلىمىزدەگى ەپيدەميولوگيالىق احۋالدى جاقسارتۋ جونىندەگى شارالار تۋرالى دەنساۋلىق ساقتاۋ ءمينيسترى الەكسەي ۆلاديميروۆيچ سوي باياندايدى.

«سوسىن ءبىرقاتار وبلىستىڭ باسشىلارىنا ءسوز بەرەمىن. قاجەت بولسا، باسقالارعا دا ءسوز بەرىلەدى. قىسقا ءارى نۇسقا، نەگىزگى ماسەلەلەرگە توقتالىڭىزدار»، - دەدى ق. توقايەۆ.


سوڭعى جاڭالىقتار