كوروناۆيرۋسقا قارسى كۇرەس: قازاقستاندىق تەلەارنالار مەن راديوستانسالار تىڭ جوبالاردى باستايدى

نۇر- سۇلتان. قازاقپارات - كوروناۆيرۋس ينفەكتسياسىنىڭ تارالۋىنا بايلانىستى ەلىمىزدە قاتاڭ كارانتيندىك شارالاردىڭ ەنگىزىلگەنى بەلگىلى.

بۇگىنگى كۇنى رەسپۋبليكالىق جانە ايماقتىق تەلەارنالار ارقىلى بەلسەندى تۇردە تۇسىندىرمە جۇمىستارى جۇرگىزىلىپ جاتىر، دەپ حابارلايدى قازاقپارات ءتىلشىسى.

قازىرگى ۋاقىتتا ماڭىزدى اقپاراتتاردى تاراتۋعا رەسپۋبليكالىق تەلەارنالار جۇمىلدىرىلعان. كوروناۆيرۋستىڭ تارالۋ پروبلەماسىنىڭ وزەكتىلىگى مەن وتكىرلىگىن تۇسىنە وتىرىپ، «Qazaqstan» ، «حابار» ، «حابار 24» قاتارلى مەملەكەتتىك تەلەارنالار COVID-19 ىندەتىمەن كۇرەسۋ جانە ونىڭ الدىن الۋ ماسەلەلەرىن تالقىلايتىن الاڭعا اينالدى. سونىمەن بىرگە تەلەارنالاردىڭ ەفيرلەرىندە ساراپشىلار ساعات سايىن حالىققا پايدالى مالىمەتتەردى بولىسۋدە. تەلەارنالاردىڭ قازىرگى باعدارلامالارى كوروناۆيرۋسپەن كۇرەس بويىنشا ماسەلەلەردى تالقىلاۋ باعىتىنا وزگەرتىلگەن.

ناقتىراق ايتقاندا «Qazaqstan» ارناسىنداعى «اشىق الاڭ» ، «حابار» ارناسىنداعى «قوعامدىق تالقىلاۋ» ، «ءبىزدىڭ نازاردا» ، «نارودنىي كونترول» جانە «كاك بوروليس س ەپيدەميامي ۆ كازاحستانە» باعدارلامالارى، «ەۋرازيا 1- ارناسىنداعى» «دوبروە ۋترو» ، «Basty Primە» ، «Astana TV» ارناسىنداعى «ايتارىم بار» باعدارلامالارى حالىق ءۇشىن ۇزدىكسىز ماڭىزدى مالىمەتتەردى تاراتۋدا. ال «حابار 24» جانە «ەل ارنا» ارنالارىنان وسى جىلدىڭ ناۋرىزىنان باستاپ «المازنىە سوۆەتى ۆ بوربە COVID /مىڭجىلعى كەڭەس» باعدارلامالارىنىڭ 64 سەرياسى شىعىپ ۇلگەردى. باعدارلامالار قازاق جانە ورىس تىلدەرىندە تارالادى. بۇل باعدارلامالارعا ءارتۇرلى باعىتتاعى 40 قا تارتا سپيكەر، ونىڭ ىشىندە د. باەشيەۆا، م. سماعۇل، ۋ. احمەدينا، ر. روزەنسون، ج. بەكشين، ل. قويشيەۆا، ج. بەكەنوۆ سىندى ماماندار ءسوز سويلەگەن.

پاندەميا باستالعالى بەرى 50 گە تارتا ۆيدەوونىم (روليكتەر، دەرەكتى فيلمدەر مەن تەلەگرافيكالار) شىعارىلعان. ولار كۇن سايىن ەلدەگى تەلەارنالار ارقىلى كورسەتىلىپ تۇرادى. ال «Qazaqstan» تەلەارناسى «تەلەمەديتسينا» اتتى جاڭا جوبانى باستادى. ول اپتاسىنا بەس رەت كورەرمەنگە جول تارتادى. باعدارلاما بارىسىندا بىلىكتى دارىگەرلەر كوروناۆيرۋسپەن كۇرەس جولدارىن ءتۇسىندىرىپ، ول كەسەلدىڭ الدىن الۋ بويىنشا قاجەتتى كەڭەستى بەرەدى. باعدارلاما بارىسىندا كەز كەلگەن ازامات قوڭىراۋ شالىپ، ءوزىن قىزىقتىرعان نەمەسە مازالاعان سۇراقتارعا جاۋاپ الا الادى. سونىمەن قاتار كورەرمەن مەسسەندجەرلەر ارقىلى الدىن الۋ ۆيدەووتىنىم جىبەرۋ ارقىلى دا مامانداردىڭ كەڭەسىن تىڭدايدى. ودان بولەك دارىگەرلەردىڭ Skype-بايلانىس ارقىلى ساۋالناما الۋعا بولادى. سونىمەن بىرگە «حابار» جانە «حابار 24» تەلەارنالارىندا جاڭا جوبالاردىڭ ءوندىرىسى باستالدى. سولاردىڭ ءبىرى - الەۋمەتتىك جەلىلەردى پايدالانۋشىلاردىڭ ءجيى كەزدەسەتىن جانە تانىمال سۇراقتارى مەن بىلىكتى مامانداردىڭ - دارىگەرلەردىڭ، پسيحولوگتاردىڭ، وسى سالانىڭ ماماندارىنىڭ جاۋاپتارى بار «سۇراق- جاۋاپ» فورماتىنداعى كۇندەلىكتى اقپاراتتىق- انىقتامالىق «Online Doctor» باعدارلاماسى. سونداي- اق «COVID-19. حالىقارالىق ساراپشىلار مەن الماس شارمان» اتتى حالىقارالىق عالىمداردىڭ قاتىسۋىمەن تىڭ باعدارلاما باستالادى. باعدارلامانىڭ جۇرگىزۋشىسى - عالىم، مەديتسينا پروفەسسورى الماس شارمان. ول ارىپتەستەرىمەن كوروناۆيرۋس تۋرالى ەڭ وزەكتى تاقىرىپتا سويلەسەدى. جوبانىڭ قوناقتارى – ا ق ش اۋرۋلاردى باقىلاۋ ورتالىقتارىنىڭ (CDC) ورتالىق ازيا ءبولىمىنىڭ ديرەكتورى، فيلوسوفيا دوكتورى دانيەل سينگەر، يسپانيا قوعامدىق دەنساۋلىق ساقتاۋ ۇلتتىق مەكتەبىنىڭ پروفەسسورى انتونيو سانتامەرو جانە تاعى باسقالار. ولار ءوز تاجىريبەلەرىمەن ءبولىسىپ، ءوز ەلدەرىندە ۆيرۋسپەن كۇرەس قالاي جۇرەتىنى تۋرالى اڭگىمەلەسىپ، ءبىرقاتار كەڭەس بەرەدى.

باستاما كوممەرتسيالىق تەلەارنالار تاراپىنان دا قولداۋ تاۋىپ وتىر. «31- ارنا» قازاق جانە ورىس تىلدەرىندە ءوزىنىڭ «كورونوۆيرۋس: نە ىستەۋ كەرەك» دەگەن جوباسىن ىسكە قوستى. «استانا» تەلەارناسى «COVID-19» جاڭا جوباسىن - ەل ازاماتتارىنا ارنالعان مەديتسينالىق تەلەكونسۋلتاتسيانى باستادى. جوبا قوناقتارى - ءارتۇرلى پروفيلدەگى دارىگەرلەر وندا كورەرمەننىڭ سۇراقتارىنا جاۋاپ بەرىپ، ەمدەۋ جانە الدىن- الۋ بويىنشا كەڭەس بەرەدى. ايتا كەتسەك تەلەارنالاردىڭ الەۋمەتتىك جەلىلەرىندە COVID-19 تاقىرىبىندا ءارتۇرلى روليكتەر مەن دەرەكتى فيلمدەر كورسەتىلەدى. ينفەكتسيونيست- دارىگەرلەر تىكەلەي ەفيردە جازىلۋشىلارمەن بىرگە ءوزىن قىزىقتىرعان سۇراقتاردى قويا الادى. سونىمەن قاتار COVID-19 ىندەتىنىڭ تارالۋىنا توقتاتىپ، وعان الداعى ۋاقىتتا جول بەرمەۋ ءۇشىن «قازاق» راديوسى، «شالقار» راديوسى، «استانا» راديوسى سەكىلدى راديوستانسالار جۇمىلدىرىلادى. ەفيردە COVID-19 ىندەتىنە قاتىستى باعدارلامالار جۇرگىزىلىپ، اۋديروليكتەر قويىلادى.