پنيەۆمونيادان قازا تاپقاندار تۋرالى تولىق دەرەك نەگە جوق - مينيستر جاۋابى

نۇر-سۇلتان. قازاقپارات – ق ر دەنساۋلىق ساقتاۋ ءمينيسترى الەكسەي سوي وكپە قابىنۋىنا شالدىققاندار مەن وسى اۋرۋدان قايتىس بولعاندار تۋرالى مالىمەتتەردىڭ ازىرشە نەگە جاريالانباي وتىرعانىن ءتۇسىندىردى، دەپ حابارلايدى قازاقپارات ءتىلشىسى.

«2020 -جىلدىڭ سوڭعى التى ايىندا وكپە قابىنۋى بويىنشا 1172 ءولىم-ءجىتىم تىركەلدى. 2019 -جىلدىڭ التى ايىندا 1780 ادام قايتىس بولعان ەدى. بۇل - جالپى سيپاتتاعى وكپە قابىنۋى. تولىقتاي العاندا بيىل وكپە قابىنۋىنا شالدىعۋ وتكەن جىلمەن سالىستىرعاندا 50 پايىزعا جوعارى بولىپ تۇر. قازىر ءبىز وكپە قابىنۋىنا بايلانىستى ساراپتاما جاساماقپىز»، - دەدى مينيستر بۇگىن ورتالىق كوممۋنيكاتسيالار قىزمەتىندەگى بريفينگىدە تىلشىلەردىڭ ساۋالىنا وراي.

ونىڭ اتاپ وتۋىنشە، كوروناۆيرۋس ينفەكسياسىنىڭ ەڭ اۋىر تۇرىنە قولدانىلاتىن ەم-دوم ءتۇرى پنيەۆمونيانى ەمدەۋگە دە قولدانىلادى. سونىمەن قاتار ول الەمدە وكپە قابىنۋىنا شالدىعۋ دەرەكتەرى وتكەن جىلعى ستاتيستيكالىق مالىمەتتەرگە قاراعاندا بيىل ءبىرشاما جوعارى بولىپ تۇرعانىن ايتتى. «ايرىقشا نازار اۋدارۋ مەن باقىلاۋدى قاجەت ەتەتىن مۇنداي رەسپيراتورلىق اۋرۋ بار ناۋقاستار سانىن ءبىلۋىمىز كەرەك. ياعني، وكپە قابىنۋى جانە بارلىق كوروناۆيرۋس ينفەكسياسى تولىقتاي تىركەۋگە الىنادى. ءبىراق، تەست ارقىلى رەسمي ناقتىلانعاندار سانى تىركەلەدى. بارلىعى تەستىلەۋدەن ءوتۋى ءۇشىن تەست سانىن قۋالاۋدىڭ قاجەتى جوق. ول ورتا- اۋىر جانە اۋىر ناۋقاستارعا قاتىستى شىناي جاعدايدى ءتۇسىنۋ ءۇشىن عانا قاجەت. سوعان باسا ءمان بەرگەن ءجون»، - دەدى الەكسەي سوي.