پرەزيدەنت، دەنساۋلىق ساقتاۋ سالاسىنداعى جۇيەلى قاتەلىكتەردى اشىق ايتتى - ساراپشى

نۇر-سۇلتان. قازاقپارات - ەۋرازيالىق ينتەگراتسيا ينستيتۋتىنىڭ ساراپشىسى باۋىرجان سەرىكبايەۆ مەملەكەت باسشىسى قاسىم-جومارت توقايەۆتىڭ ەلىمىزدە قالىپتاسقان احۋالعا بايلانىستى ۇندەۋىنە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«بايقاساڭىزدار، پرەزيدەنت ماسەلەگە كەلگەندە پروبلەمانى اشىق مويىندايدى. بۇرىنعىداي «بىزدە ءبارى جاقسى» دەگەن بەلدەن باسۋ جوق. ەستەرىڭىزدە بولسا سايلاۋدان كەيىن قازاقستان حالقىنىڭ كەدەيلەنىپ كەتكەنىن اشىق ايتتى. ارتىنشا نەسيەنى دە كەشىردى. تابىسى كوپتەر كوپ سالىق تولەسىن، كىرىسى ازدار از تولەۋى قاجەت دەپ الەۋمەتتىك ادىلەتتىلىك تۋرالى دا وڭ باستامالاردىڭ باستاۋىندا ءجۇر»، - دەپ جازادى باۋىرجان سەرىكبايەۆ Facebook پاراقشاسىندا.

ونىڭ جازۋىنشا، ەڭ باستىسى مەملەكەت باسشىسى بۇگىن حالقى قينالىپ جاتقاندا كوڭىلگە دەمەۋ بەرىپ، دەنساۋلىق ساقتاۋ سالاسىندا جۇيەلى قاتەلىكتەر بولعانىن دا اشىق ايتقان. بۇعان قاتىستى بارلىق سالا جۇمىستارىنا تەكسەرۋ جۇرگىزەتىنىن، اكىمدەردىڭ جۇمىسىنا كوڭىلى تولمايتىنىن دا بىلدىرگەن.

«پرەزيدەنت قادامدارىنان جاعدايدى باقىلاپ وتىرعانى، وزگەرىسكە دەگەن قۇلشىنىسى بايقالادى. تاجىريبەلى ساياساتكەرلەرگە ءتان سابىرلىق پەن اقىرىنداپ العا جىلجۋ بار. پرەزيدەنت وسىلاي ءجيى شىعىپ، توسىننان كەلگەن ىندەتتەن ابدىراپ قالعان حالىققا دەمەۋ بولسا دەيمىز»، - دەيدى باۋىرجان سەرىكبايەۆ.

ەسكە سالا كەتسەك، كەشە مەملەكەت باسشىسى قاسىم-جومارت توقايەۆ رەسپۋبليكالىق تەلەارنالار ارقىلى ەلىمىزدە قالىپتاسقان احۋالعا بايلانىستى ۇندەۋ جاريالاعان بولاتىن.