قارجاۋباي سارتقوجا ۇلى ىندەت جايلى: كۇش بىرىكتىرسەك عانا بۇل قيىندىقتان قۇتىلامىز
مەملەكەت باسشىسى قاسىم-جومارت توقايەۆتىڭ رەسپۋبليكالىق تەلەارنالار ارقىلى ەلىمىزدە قالىپتاسقان احۋالعا بايلانىستى ۇندەۋى جايلى «وتانداستار قورى» جانىنان قۇرىلعان «قوعامدىق قابىلداۋ» كوميسسياسىنىڭ مۇشەسى، جازۋشى، تۇركىتانۋشى قارجاۋباي سارتقوجا ۇلى وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«مەملەكەت باسشىسى قاسىم-جومارت توقايەۆتىڭ حالىققا جولداعان ۇندەۋىن تىڭدادىم. پرەزيدەنت باستاماسىن تولىق قولدايمىن. الەمگە تارالعان جۇقپالى ىندەت حالقىمىزدىڭ ەڭسەسىن باسا المايدى. ەلىمىزدە كارانتين رەجيمى ەرتە ەنگىزىلىپ، ساقتىق شارالارى ۋاقتىلى جاسالدى. دەسە دە قازىرگى ۋاقىتتا اۋرۋ جۇقتىرعان ادامداردىڭ سانى ارتىپ بارادى. ءبىز بىرلىكتە كۇش بىرىكتىرسەك عانا بۇل قيىندىقتان قۇتىلامىز. قازاقستان رەسپۋبليكاسىنىڭ دەنساۋلىق ساقتاۋ مينيسترلىگى العاشقى كەزەڭنەن باستاپ حالىققا اقپارات بەرىپ وتىردى. كەتكەن كەمشىلىكتەردى ۋاقىت تارازىلايدى»، - دەيدى قارجاۋباي سارتقوجا ۇلى.
ەسكە سالا كەتسەك، كەشە مەملەكەت باسشىسى قاسىم-جومارت توقايەۆ رەسپۋبليكالىق تەلەارنالار ارقىلى ەلىمىزدە قالىپتاسقان احۋالعا بايلانىستى ۇندەۋ جاريالاعان بولاتىن. پرەزيدەنت وتانداستارىمىزدى حالقىمىزدىڭ باسىنا تۇسكەن سىناق الدىندا قايسارلىققا، سابىر مەن جاۋاپكەرشىلىككە شاقىردى.