قاسىم- جومارت توقايەۆ: الاپات ىندەت ارامىزدان تالاي اسىلدارىمىزدى جۇلىپ اكەتۋدە
«ىندەتپەن كۇرەستىڭ ناتيجەلى بولۋى ەڭ الدىمەن بارشا جۇرتتىڭ سانالى ارەكەتى مەن جاۋاپكەرشىلىگىنە بالانىستى. بۇل وتە قاۋىپتى، باتپانداپ كىرەتىن، مىسقالداپ شىعاتىن دەرت. كوروناۆيرۋستىڭ تارالۋىنا بايلانىستى دەنساۋلىق ساقتاۋ جۇيەسىنە كوپ اۋىرتپالىق تۇسۋدە. اشىعىن ايتۋ كەرەك، دەنساۋلىق ساقتۋ جۇيەسى ىندەتكە تويتارىس بەرۋگە دايىن بولعان جوق»، - دەدى مەملەكەت باسشىسى.
«دەگەنمەن، مەملەكەت تاراپىنان بارلىق قاجەتتى شارالار قابىلدانۋدا. قابىلدانعان شارالار مەن مەديتسينا قىزمەتكەرلەرىنىڭ ەرلىگىنىڭ ارقاسىندا ەمدەلىپ شىعىپ جاتقان ازاماتتاردىڭ سانى ەداۋىر كوبەيدى. كوپتەگەن ەلدەردەگى جاعداي بىزدەن دە قيىن. دەگەنمەن، «ءار قازاق - مەنىڭ جالعىزىم» دەگەندەي، ءار ازاماتىمىزدىڭ قازاسى مەنىڭ جۇرەگىمە قاتتى باتادى. مىناۋ الاپات ىندەت ارامىزدان تالاي اسىلدارىمىزدى جۇلىپ اكەتۋدە. بۇگىندە قارا جامىلىپ وتىرعان ازاماتتاردىڭ قايعىلارىنا ورتاقتاسىپ، كوڭىل ايتامىن. سول ءۇشىن 13- شىلدەنى - ۇلتتىق ازا تۇتۋ كۇنى دەپ جاريالايمىن. ءبىراق، ءبىزدىڭ كۇرەسىمىز جالعاسا بەرەدى»، - دەدى مەملەكەت باسشىسى.
ق ر پرەزيدەنتى بۇل ىندەتتى ادامزات جۋىق ارادا جەڭە قويماس دەگەن الاڭداۋشىلىعىن تانىتتى. «الايدا، ۋايىم مەن قايعىعا باتىپ، ءتۇرلى قاۋەسەتتەرگە سەنىپ، ەڭسەمىزدى تۇسىرۋگە تاعى دا بولمايدى. سالماقتى، سابىرلى بولايىق! ءبىزدىڭ جۇمىسىمىز - ايقىن، قوعام الدىندا ەشنارسەنى جاسىرماي، اشىق ايتامىز. بولاشاقتا دا سولاي بولادى. بۇكىل كۇش جىگەرىمىزدى جيناپ، ىندەتپەن كۇرەسە بەرۋىمىز كەرەك»، - دەدى قاسىم- جومارت توقايەۆ.
اۆتور: مارلان جيەمباي