ق ر پرەزيدەنتى «استانا» حالىقارالىق قارجى ورتالىعى سوتى ءتوراعاسىنىڭ انت بەرۋ راسىمىنە قاتىستى

نۇر- سۇلتان. قازاقپارات – ق ر پرەزيدەنتى قاسىم- جومارت توقايەۆ «استانا» حالىقارالىق قارجى ورتالىعىنىڭ سوتى ءتوراعاسىنىڭ انت بەرۋ راسىمىنە قاتىستى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

پرەزيدەنت قاسىم- جومارت توقايەۆ «استانا» حالىقارالىق قارجى ورتالىعى (ا ح ق و) سوتىنىڭ جاڭادان تاعايىندالعان ءتوراعاسى لورد مانستىڭ رەسمي انت بەرۋ راسىمىنە ونلاين فورماتتا قاتىستى. مەملەكەت باسشىسى ءوز سوزىندە، قازاقستان حالىقارالىق ستاندارتتارعا ساي كەلەتىن زاماناۋي، كاسىبي جانە تاۋەلسىز سوت جۇيەسىن قالىپتاستىرۋعا ەرەكشە كوڭىل بولەتىنىن اتاپ ءوتتى. وسى ورايدا تۇڭعىش پرەزيدەنت - ەلباسى نۇرسۇلتان نازاربايەۆتىڭ باستاماسىمەن «استانا» حالىقارالىق قارجى ورتالىعىنىڭ سوتىن قۇرۋ ارقىلى ەلىمىز سوت جۇيەسىندەگى قۇرىلىمدىق رەفورمالارعا بەيىلدى ەكەنىن تاعى ءبىر مارتە انىق ايقىنداپ وتىر.

- «استانا» حالىقارالىق قارجى ورتالىعىنىڭ سوتى قازاقستاندا جۇمىس ىستەپ جاتقان نەمەسە ەلىمىزگە كەلۋدى جوسپارلاپ وتىرعان ينۆەستورلارعا الەمدەگى بارلىق ءىرى قارجى ورتالىقتارىنداعىداي لايىقتى سوتتارمەن، سوت پروتسەسستەرىمەن، تاجىريبەسىمەن جانە ستاندارتتارىمەن جۇمىس ىستەۋگە مۇمكىندىك بەرەدى. جالپى قۇقىق بويىنشا تاجىريبەلى سوتتار وزدەرىنىڭ بەيتاراپتىلىعىمەن، ادىلدىگىمەن جانە بارماق باستى، كوز قىستىعا كونبەيتىندىگىمەن تانىمال. سونداي- اق ولار سوت جۇيەسىنىڭ تۇراقتىلىعى مەن قۇقىق بۇزىلماۋىنىڭ كەپىلى، - دەدى پرەزيدەنت.

قاسىم- جومارت توقايەۆتىڭ پىكىرىنشە، پاندەميا مەن مۇناي باعاسىنىڭ قۇلدىراۋىنان تۋىنداعان قازىرگىدەي داعدارىس كەزىندە ەل ەكونوميكاسىن قايتا قالپىنا كەلتىرۋ جۇمىسىندا، ينۆەستيتسيا تارتۋ بارىسىندا «استانا» حالىقارالىق قارجى ورتالىعىنىڭ ماڭىزى ارتا تۇسكەن.

- ا ح ق و سەنىمدى قارجىلىق پلاتفورما ۇعىمىنىڭ سينونيمىنە اينالىپ، شەتەلدىك ينۆەستورلاردىڭ قازاقستانعا دەگەن سەنىمىن ارتتىرۋى كەرەك. ءوز كەزەگىندە «استانا» حالىقارالىق قارجى ورتالىعىنىڭ ماڭىزدى بولىگى رەتىندە قارجى ورتالىعىنىڭ تاۋەلسىز سوت جۇيەسىنىڭ جالپى قۇقىق بويىنشا سوتىنا ا ح ق و- نىڭ قىزمەتىندە ەرەكشە ءرول اتقارادى. سوعان سايكەس قازاقستاننىڭ ينۆەستيتسيالىق باعدارلاماسىنىڭ ءتيىمدى جۇزەگە اسۋىنا اتسالىسادى، - دەدى مەملەكەت باسشىسى.

شارا سوڭىندا قازاقستان پرەزيدەنتى لورد ۆۋلفكە قارجى ورتالىعىنىڭ سوت جۇيەسىن قۇرۋ بارىسىندا سىڭىرگەن ەڭبەگى ءۇشىن العىس ايتىپ، لورد مانسقا ا ح قو سوتىنىڭ ءتوراعاسى رەتىندەگى جۇمىسىنا تابىس تىلەدى.