نيدەرلاندىدا جاسىرىن تۇرمە مەن ازاپتاۋ كامەراسى تابىلدى
ۇيىمداسقان قىلمىستىق توپ پايدالانعان جاسىرىن تۇرمە مەن ازاپتاۋ كامەراسى بەلگيامەن شەكارادا ورنالاسقان ۆوۋۆز پلانتاج كوممۋناسىندا قويمادان تابىلعان. ادامداردى ۇرلاۋعا ازىرلەنىپ، ولاردى تۇتقىنعا الىپ ازاپتاماقشى بولعان التى ادام ۇستالدى. پوليتسيا روتتەردامداعى ەكىنشى نىساننان قارۋلارىن ساقتاعان ورىن تاپتى. قىلمىس EncroChat مەسسەندجەرىندەگى حابارلامانىڭ قۇپياسىن اشىپ وقۋ بارىسىندا اشكەرەلەندى.
تۇرمەگە جەتى تەڭىز كونتەينەرى قويىلعان، ولاردىڭ التاۋى تۇرمە كامەراسى رەتىندە پايدالانىلسا، جەتىنشىسى - ازاپتاۋ بولمەسى رەتىندە قولدانىلعان. حابارلامادا بەلبەۋى بار ستوماتولوگيالىق كرەسلو ورنالاسقان كونتەينەردىڭ سۋرەتى بولعان. سونداي- اق، قىلمىسكەرلەر ادامداردى ۇرلاۋ جانە ازاپتاۋ تۋرالى تالقىلاعان. كۇدىكتىلەر بۇل جەردى «ەبي» دەپ اتاعان، گوللاند تىلىنەن اۋدارعاندا «ەمدەۋ كابينەتى» بار قاتاڭ رەجيمدەگى پەنيتەنتسيارلىق مەكەمە دەگەندى بىلدىرەدى. پوليتسيا «تۇرمەنى» ءساۋىردىڭ ورتاسىنان باستاپ اڭدىعان. وسى نىساندا كۇندە جۇمىس ىستەيتىن بىرنەشە ەر ادامدى بايعان. كونتەينەرلەر دىبىس جانە جىلۋ وتكىزبەيتىندەي ەتىپ جاسالىنعان. ءار كامەرانىڭ ەدەنى مەن توبەسىنە كىسەن، ال بۇرىشقا ۆيدەوكامەرا قويىلعان. پوليتسيا كونتەينەرلەردىڭ بىرىنەن پوليتسيانىڭ ارنايى كيىمىن، وق وتكىزبەيتىن كوكىرەكشە مەن جىپىلداۋىق تاپقان. تاعى ءبىر كونتەينەردە ازاپتاۋعا ارنالعان قۇرالدار - قايشى، ارا، سكالپەل، قىسقىش، كىسەن، سكوتچ، قاپ سالىنعان سومكە بولعان. قۇقىق قورعاۋشىلار ۇرلانعان جۇك كولىگى مەن ەكى BMW اۆتوكولىگىن تاپتى.
حابارلامادا روتتەردامدا ورنالاسقان ەكىنشى قويما تۋرالى ايتىلعان. پوليتسەيلەر ول جەردەن جەتى تاپانشا مەن اۆتومات تاپتى. ولار ون ءبىر جەردى ءتىنتىپ شىعىپ، روتتەردامداعى ۇيلەردىڭ بىرىنەن 24 كەلى «ەكستازي» ەسىرتكىسىن انىقتادى. كۇدىكتىلەردەن 25 قارۋ تاركىلەندى.
اۆتورى: تيمۋر دۇيسەكەيەۆ