الماتى وبلىسىندا شەتەل ازاماتى جالدامالى پاتەردى توناپ، وتانىنا قاشقان
الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 2019-جىلدىڭ ناۋرىز ايىندا قاراساي اۋدانىنىڭ پوليتسيا باسقارماسىنا سول اۋداننىڭ 37 جاستاعى تۇرعىنى ارىزدانعان.
ول 1 ميلليون تەڭگەدەن استام اقشاسى مەن جەكە زاتتارىنىڭ ۇرلانعانىن جەتكىزگەن.
اتالعان فاكتى ق ر ق ك- ءنىڭ 188-بابى 2-بولىگىنىڭ 3-تارماعى بويىنشا تىركەلدى. پوليتسيا قىزمەتكەرلەرى وقيعا ورنىنا شىعىپ، كۇدىكتى پاتەرگە كىلتتى تاڭداۋ ارقىلى كىرگەنىن انىقتادى.
سول پاتەردى جالداپ تۇرعان تاجىكستاننىڭ 29 جاستاعى ازاماتى ءتارتىپ ساقشىلارىنىڭ كۇدىگىن تۋدىرعان. ول دەرەۋ وقيعا ورنىنان ءىزىن سۋىتقان.
الايدا، قاشقىن ۇستالدى. ول جاقىندا قازاقستانعا ورالىپ، نۇر-سۇلتان قالاسىنداعى قۇرىلىس نىساندارىنىڭ بىرىندە جالدانىپ جۇمىس ىستەي باستاعان. ۇرلىق ۇمىتىلعان دەپ ويلاعان. كۇدىكتى ميلليون تەڭگە جانە قالعان مۇلىكتەردى ۇرلاعانىن مويىندادى.
قىلمىس جاساعاننان كەيىن وتانى - تاجىكستانعا بارىپ، اقشانى جەكە قاجەتتىلىكتەرىنە جۇمساعان.
تەرگەۋ سۋدياسى سوتقا دەيىنگى تەرگەۋ كەزەڭىندە ونى قاماۋعا الۋ تۇرىندەگى بۇلتارتپاۋ شاراسىن سانكتسيالادى. تەرگەۋ اياقتالۋعا جاقىن.