يليا يلين اۋرۋحاناعا ءتۇسىپ قالدى
سپورتشى ءوزىنىڭ Instagram پاراقشاسىندا دارىگەرلەرگە ارناپ ۆيدەو ۇندەۋ جولدادى.
«مەن بۇل ۆيدەونى جۇكتەگىم كەلمەدى، ءبىراق قازىرگى قال جاعدايىمدى جازعانىم دۇرىس دەپ شەشتىم. قازىر ءبارى ويداعىداي. ۆيدەودا ءبارىن قىسقاشا ايتتىم. دارىگەرلەرىمىزگە كوپ راقمەت! قازىر سىزدەر ءۇشىن وتە قيىن كەزەڭ ەكەنىن ءبارىمىز جاقسى تۇسىنەمىز. سىزدەرگە بۇكىل قازاقستان حالقى ۇمىتپەن قاراپ وتىر»، - دەپ جازادى يليا يلين.
ءوزىنىڭ ايتۋىنشا، اۋىر اتلەت التى كۇننەن بەرى اۋرۋحانادا جاتىر. ول كوروناۆيرۋس جۇقتىرماعان، كۇيزەلىسكە بايلانىستى اللەرگيالىق رەاكتسيا بولعان.
قىزىلوردالىق دارىگەرلەر ارەڭ دەگەندە ەسىن جيعىزعان. قازىر ول ەكىنشى كۇن قاتارىنان جاتتىعۋ جاساپ، اۋرۋدى جەڭۋگە بار كۇشىن سالىپ جاتىر.
«دوستار، وزىڭىزگە جانە جاقىندارىڭىزعا قامقور بولىڭىز» دەگەن سپورتشى ءوزىنىڭ جاتقان پالاتاسى مەن قالاي جاتتىعۋ جاساپ جۇرگەنىن كورسەتەدى.
ەسكە سالا كەتەيىك، يليا يلين تاياۋدا عانا قىزىلورداداعى «مۇز سارايىنىڭ» ديرەكتورى بولىپ تاعايىندالعان ەدى.